Connect with us

Jamii

Ajali ya MV Bukoba tumeshindwa kujifunza!

Published

on

MV Bukoba ikizamaNi mfano wa sinema ya kutisha iliyojaa kila aina ya ukatili.Abiria wachache walionusurika katika ajali ya kuzama kwa meli ya Mv Bukoba May 21,mwaka 1996 bado wanaamini walipona kwa muujiza.

Miaka kumi na tano baada ya tukio hilo,leo hisia zinaturudisha katika kumbukumbu za ajali hiyo ambayo ilipima uwezo na udhaifu wetu wa kukabiliana na maafa ambayo tumeendelea kuyashuhudia kwa vipindi tofauti.

Wanafunzi wa sekondari za Bwiru wavulana na wasichana wanaikumbuka sana siku hii hasa waliozoea kuoga ziwani asubuhi,kwa mbali waliona harakati za mitumbwi na meli eneo la tukio.Wengi walitoroka na kujikuta uwanja wa mpira Nyamagana wakishangaa  kuwasili kwa miili ya marehemu.

Tangu kuzama kwa meli ya Mv Bukoba limebaki kuwa tukio la kihistoria ambalo athari zake ziko wazi kwa mamia ya familia waliopoteza ndugu na wategemezi wao.Inakadiliwa zaidi ya watu 800 walikufa ingawa katika nchi isiyo na mfumo mzuri wa ukusanyaji wa takwimu kwa vyovyote vile idadi hiyo haiwezi kuwa sahihi.

Kwamba meli hiyo ilikuwa imejaza kuzidi uwezo wake sio habari mpya,kwani tangu wakati huo mamia ya wasafiri wa majini wameendelea kupoteza maisha kwa tatizo lile lile la kuruhusu vyombo vilivyochoka kuzidisha abiria.

Familia zilizokuwa na uwezo ziligeuka masikini yatima,wajane na wagane wakishindwa kudai mali za ndugu zao.Wenye tamaa walitumia udhaifu wa marehemu kutoandika wosia kupora mali na kujitajirisha na hata familia za wahanga kubebeshwa mzigo wa madeni.

Tulitakiwa kujifunza kutokana na ajali hiyo kuliko kuendelea kuficha udhaifu wa vyombo hivyo kwa kuvipaka rangi mpya huku tukijua havina uwezo au vimepoteza sifa ya kusafirisha abiria na mizigo yao.

WASEMAVYO WAHANGA WA MEI 21
David Mutensa mfanyabiashara wa mjini Bukoba ni miongoni mwa abiria walionusurika ambaye hajui sehemu ya kuanzia simulizi baada ya kuelea majini kwa muda wa saa tano akisubiri kuokolewa.

Anaanza hivi:

Akiwa ni abiria wa daraja la kwanza aliona hali imekuwa mbaya mapema alfajili na meli ilipoanza  kupinduka na kuzama alichukua boya dogo na kujirusha majini huku kila abiria akipigania roho yake.

“Sijui pa kuanzia kwani lilikuwa ni tukio la ghafla,meli kupinduka haijawahi kutokea duniani nilivaa boya dogo na kumwambia mwanamke aliyekuwa jirani yangu twende,akasema twende wapi mwanangu”anaeleza

Anasema alifahamu matumizi ya maboya(life jacket)baada ya kusafiri mara nyingi na meli na wakati mmoja mabaharia waliwahi kufanya mazoezi ndani ya meli jinsi ya kujiokoa kwa kutumia vifaa hivyo.

Maana yake ni kuwa wapo abiria wengi ambao hawakuwahi kuona vifaa hivyo achilia mbali kufahamu matumizi yake na kwa kuikosa elimu hiyo walishindwa kujiokoa hata kama vifaa hivyo vilikuwa mbele yao.

Huyu ni miongoni mwa abiria wengi waliolazimika kuanza upya shughuli zao za biashara na kuwa kifuta machozi cha shilingi laki moja kwa aliyenusurika na laki tano kwa waliopoteza ndugu hakikuwa kipimo sahihi ikilinganishwa na madhara waliyopata.

Simulizi ya Benezeti Benedict(46) mkazi wa kijiji cha Kashaba wilayani Missenyi inasikitisha.Ilikuwa mara yake ya kwanza kupanda meli akielekea Dar es salaam na kuwa ana umbukumbu mbaya za tukio hilo na hakuwahi kutamani kupanda tena meli.

Anasema akiwa ni abiria wa daraja la tatu pamoja na ugeni wake kwenye meli majira ya saa tisa usiku meli ilionekana kuwa na tatizo hali iliyomfanya asilale na kupakata begi kwa hofu.

Anachokumbuka ni kuwa ililala upande wa kushoto na baadaye upande wa kulia majira ya alfajili na kujikuta ameshikilia boya moja watu saba akiwemo mwanamke mmoja.

“Sikuwahi kupanda meli ,usiku nilikuwa na wasiwasi na ilizama taratibu kwa kulalia upande wa kulia nilikimbilia upande wa nyuma ya meli na kuona watu wakielea majini”anasema

Ni tukio analosema lilikuwa mwanzo wake wa kuwa na ugonjwa washinikizo la damu mpaka leo,anapokumbuka picha mbaya ya ajali hiyo.

Huyu naye alipona kimiujiza.Geofrey Francis mkazi wa kijiji cha Buhembe nje ya mji wa Bukoba alikwenda bandarini amechelewa na matokeo yake aliambulia virungu vya polisi waliokuwa wanawazuia abiria wasiendelee kujipenyeza na kupanda meli hiyo.

Anadai juhudi za kutoa kiasi kidogo cha fedha kwa askali ili aruhusiwe hazikufanikiwa na aliungana na abiria wengine watatu ambapo walichukua uamuzi wa kukodi tax na kuifuata meli hiyo bandari ya Kemondo.

Katikati ya safari ya kuelekea Kemondo yalitokea mabishano kama kweli wataiwahi meli hiyo, tofauti iliyomfanya kila mmoja kutafuta sehemu ya kulala bila shaka kujipanga kutoa maelezo kwenye familia juu ya kisa cha kuachwa na meli.

Ni baadhi ya maelezo ya walionusurika, na wakati tukikumbuka miaka kumi na tano tangu kuzama kwa meli ya Mv Bukoba yameendelea kuwepo maafa mengi kama ushahidi kuwa uwezo wa kukabiliana na majanga bado haujaimarika.

Pamoja na ukubwa wa tukio hili taifa limeshindwa kutenga hata dakika moja ya kukaa kimya kuwakumbuka wahanga waliopoteza maisha.Dakika ya kutafakari tulipokosea na kujutia uzembe wetu ambao ni chanzo cha machozi, jasho na damu.

Wakizungumzia hali ya usafiri wa majini ilivyo sasa na wakati uliopita baadhi ya wananchi wameshauri kufanyika kwa ukaguzi wa mara kwa mara na kuongeza udhibiti wa ajali za majini.

Mmojwa wa wananchi hao John Lwekanika alilalamikai ubovu wa vyombo vinavyosafiri na kuwa Mv Bukoba isingezama kama viongozi wangekuwa makini tangu ununuzi wake hadi kuruhusu matumizi.

Anadai kuwepo kwa taarifa za muda mrefu kuwa meli hiyo ilikuwa na mapungufu ambayo yalifumbiwa macho na hatimaye kusababisha maafa makubwa.

Naye mshindi wa tuzo ya uandishi wa masuala ya majanga kwa mwaka 2010 Salome Gregory,anasema taifa halina mipango bayana ya kukabiliana na majanga na kuwa matukio mengi yanaweza kukabiliwa endapo viongozi watakuwa na dhamira ya kweli.

Ni mshindi kutoka gazeti la The Citizen ambaye anaamini elimu ya majanga ikitolewa mashuleni na katika ngazi ya familia utakuwa ni msingi wa kuzalisha viongozi wa watakaoibuka na mikakati ya kuyakabili majanga.

MAJANGA NA USIRI WA TAARIFA
Kama ilivyo ada matukio mengi ya maafa huundiwa tume za uchunguzi na hatimaye matokeo yake huwa siri ya waliochunguza na wale waliopelekewa taarifa.

Mapendekezo ya tume hufungiwa kabatini na wananchi huendelea kuongozwa na hisia wakati wa kujadili utata wa tukio.

Katika nchi ambayo watendaji hugoma kuwajibika kwa kujiudhuru hata kama maafa yanahusishwa na uzembe,taarifa hizi ni muhimu kwani zinatoa mwanga kwa walioathirika kufungua malalamiko ya kulipwa fidia wakitegemea ushahidi wa tume.

Tangu kuzama kwa meli ya Mv Bukoba yamefuata maafa mengi yaliyohusisha kuzama kwa meli,mitumbi,treni, kufukiwa migodini achilia mbali maafa ya hivi karibuni katika kambi za jeshi Mbagala na Gongo la mboto.

Tulitakiwa kujifunza kutokana na makosa na haikutegemewa kuwa baada ya miaka michache meli ya Mv Nyamageni ingezama katika ziwa lile lile na kuua abiria 28,na mpaka leo taarifa ya uchunguzi wa ajali hiyo haiko wazi.

Hakuna kiongozi aliyewajibika kama ambavyo hawafikirii ,pale walipokufa abiria 281 tarehe 24,Juni 2002   baada ya treni kugongana na 73 kuzikwa makaburi ya maili mbili kule Dodoma baada ya kutotambuliwa kama wale wa Mv Bukoba waliozikwa kule Igoma jijini Mwanza.

Kama somo lingekolea ajali ya August 5,ya wanafunzi 18 kufa maji kwa mtumbwi ziwa Viktoria wilayani Sengerema wakienda shuleni isingetokea.Tukio hilo lilitanguliwa na vifo vya wanafunzi tisa waliozama mto Rufiji mkoani Pwani. Hatuwezi kukwepa ukweli kuwa ajali nyingi hazirekodiwi.

Tumeshuhudia juhudi za kujikosha kama ilivyokuwa baada ya wanafunzi 48 wa sekondari ya Shauritanga kuungua mabwenini.Shule zilipewa vifaa vya kuzima moto na kufundishwa matumizi yake.Hakuna anayejua kama ilikuwa hujuma,uzembe au vinginevyo.Mwaka jana Shule ye wasichana Rugambwa mabweni yameungua mara tatu na wanafunzi kunusurika kifo na hakuna kifaa chochote cha kuzima moto.

RAIS KIKWETE NA UJIO WA MELI MPYA
Miongoni mwa ahadi lukuki za rais Jakaya Kikwete kwa wakazi wa mkoa wa Kagera wakati akisaka mhura wa pili wa uongozi ni meli mpya kama mbadala wa Mv Bukoba. Ni kauli yenye matumaini na hakuna sababu ya kuitilia shaka kwamba ilificha hila za wanasiasa hasa pale uchaguzi usipotabilika.

Pamoja na kuimarika kwa miundombinu ya barabara kati ya Bukoba na Mwanza bado uhakika wa usafiri wa majini ni muhimu kwa ajili ya shughuli za kiuchumi. Wananchi watachagua aina ya usafiri waupendao na kuongeza ushindani katika upangaji wa bei.

Hata meli kongwe ya Mv Victoria ambayo inafanya safari zake kati ya Bukoba na Mwanza imeendelea kuwatia abiria wake majaribuni,na imekuwa ikifanyiwa matengenezo ya mara kwa mara ambapo katika kipindi hicho meli ya mizigo ya Mv Serengeti huziba nafasi hiyo kwa muda.

Mwaka 2004, meli ya Mv Viktoria iligonga mwamba eneo la Mubembe ikitoka Mwanza kuelekea Kemondo.Katika hotuba ya mpango wa maendeleo na makadirio ya matumizi ya fedha 2004/2005 aliyekuwa Waziri wa Mawasilinao na Uchukuzi Profesa Mark Mwandosya alidai ajali hiyo ilisababishwa na uzembe wa wafanyakazi.

Alisema uchakavu wa meli na changamoto nyingine vilisababisha lengo la makusanyo lisifikiwe kwa asilimia sita.Hata hivyo kosa moja la uzembe linaweza kuteketeza maisha ya maelfu ya watu na hali hiyo haiwezi kudhibitiwa kwa kushushwa vyeo, au uhamisho.

Kumbukumbu ya kuzama kwa meli ya Mv Bukoba iturudishe kwenye umuhimu wa kuwa na viongozi wanaowajibika kwa kauli na vitendo. Ni dakika moja ya kujuta na kutafakari.

Continue Reading
4 Comments

4 Comments

  1. podius

    10/09/2011 at 7:58 pm

    Kiukweli ajali ya meli ya mwaka 1996,mei 21 ilikuwa ni pigo la kitaifa kwani sensa ingefanyika wakati huo katika mji wa Bukoba au Mkoa wa Kagera kwa ujumla idadi kubwa ya watu ilikuwa imepote.Kama ikishatokea tunasema ni mipango ya Mungu lakini chanzo kikubwa ni wasimamizi wa vyombo vya usafiri wa majini kwani chanzo kikubwa ni mizigo kuzidi kiasi pamoja na kuwa na ubovu wa baadhi ya vifaa katika chombo husika.Jamani serikali inatutakia nini mbona tunanyanyaswa kama hatuko katika nchi yetu tena tuko huru uhuru tuliupata mwaka 1961?? Haya sasa ajali nyingine imetokea Zanzibar na ni matokeo ya (over carrying).Jamani kwa heshima na tahadhima tunaomba tusaidiwe katika kuboresha na kusimamia usafiri wa majini maana sasa umekuwa wimbo wa ajali majini..Nawapeni pole wote waliopoteza ndugu,jamaa na marafili na Mungu aziweke na kuzipumzisha roho za marehemu mahali pema peponi.AMINA.

  2. mussa

    05/03/2012 at 4:34 pm

    tanzania s govment must adhere a pro active part of disaster management.this will reduce marine accidents/

  3. Raban RICHARD

    21/05/2012 at 2:25 am

    jaman mbona siku za karume day;nyerere na mengane tunaazimisha lakin matukio muhimu na kubwa tume kaa kimya

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com