Connect with us

Jamii

Miaka 56 ya Uhuru: Babu Seya, mwanaye waachiwa huru, Rais atoa msamaha kwa wafungwa wengine 8,157

Published

on

Rais John Magufuli ametoa msamaha na kuagiza kuachiwa huru kwa familia ya Nguza Viking maarufu ‘Babu Seya’ na mwanaye Johnson Nguza ambao walihukumiwa kifungo cha maisha kwa makosa ya ubakaji.

Babu Seya ambaye ni Msaani nguri wa mziki wa dansi nchini na mwanaye Johnson Nguza (Papii Kocha) walihukumiwa kifungo cha maisha gerezeni kwa kosa la kubaka na kulawiti watoto 10 mwaka 2003, ambapo Juni 25, 2004 walianza kutumikia kifungo chao. Kwa nyakati tofauti wamejaribu kutumia njia za kisheria kujinasua katika hukumu hiyo lakini hawakufanikiwa, hadi hivi leo walivyopata msamaha wa rais.

Akizungumza leo katika sherehe za miaka 56 ya Uhuru wa Tanzania Bara zilizofanyika Makao Makuu ya nchi mjini Dodoma, rais Magufuli amesema msamaha huo umetolewa kwa wafungwa wengine 8,157 ambao walikuwa wamefungwa katika magereza mbalimbali nchini na amefikia uamuzi huo baada ya kujiridhisha kuwa wafungwa hao wamejirekebisha na wanastahili kurudi uraiani kujenga taifa.

“Kutokana na ibara hiyo hiyo ya 45 nimeamua kumsamehe familia ya Nguza Viking jina lingine anaitwa babu Seya na ndugu Johnson Nguza hivyo nao waachiwe huru kuanzia leo”, amesema rais Magufuli.

Baada ya rais kumtaja Babu Seya ulisikika mlipuko wa shangwe na furaha kutoka kwa wananchi na kuibua hisia tofauti katika uwanja wa Jamhuri ambako sherehe zilikuwa zinafanyika.

Msamaha huo wa rais alioutoa kwa wafungwa 8, 157 unahusisha wafungwa 1,828 ambao wataachiliwa huru kuanzia leo na wengine 6,326 wamepunguziwa muda wao wa kukaa gerezani kulingana na vifungo vyao.

Msamaha huo umetumia Ibara ya 45 ya katiba ya Jamhuri ya Muungano wa Tanzania ambayo inampa rais mamlaka ya kutoa msamaha na kufuta au kumpunguzia adhabu mtu yeyote aliyehukumiwa na mahakama kwa makosa mbalimbali.

Amebainisha kuwa idadi kubwa ya wafungwa waliopo magerezani ni wanaume na amewataka kujitathmini kutokana na mienendo yao ya uharifu inayowafikisha mikononi mwa vyombo vya sheria.

“Nataka niwaeleze ndugu zangu, Tanzania tuna wafungwa 39,000 mpaka jana kati ya wafungwa hao wanaume ni 37,000, wanawake ni 2000, kwa hiyo katika kufungwa hakuna usawa. Lakini wafungwa waliohukumiwa kunyongwa ni 522, wafungwa waliohukumiwa maisha wako jumla 666 kati yao wanaume wako 651 na wanawake ni 11. Wanaume tuanze kujitambua kwanini hali iko hivi”,

“Wapo wafungwa ambao wametubu kweli dhambi zao, wamekiri makosa yao  kweli kweli. Baada ya kukaa nakufikiria na hasa kwasababu binadamu wote huwa tunaomba kusamehewa”, amesema rais.    

Hata hivyo, rais ametoa angalizo katika msamaha huo kuwa hautahusisha wafungwa waliohukumiwa kwa makosa ya mauaji ya watu wenye ulemavu wa ngozi (Albino).

Baada ya rais kutoa agizo hilo, Babu Seya na Papii Kocha wameachiwa na kutoka gerezani Ukonga, jijini Dar es Salaam na kulakiwa na familia na mashabiki wao.

Babu Seya (wa pili kulia) akiwa na mtoto wake Papii Kocha (wa pili kushoto) wakati wa kesi yao

 

Kwa upande wake, Chama Cha Demokrasia na Maendeleo (CHADEMA), kupitia idara ya Habari na Mawasiliano kimempongeza rais Magufuli kwa ujasiri aliouonyesha wa kumwachia huru Babu Seya na kutaja hatua hiyo ni kutimiza ahadi ya Mjumbe wa Kamati Kuu ya chama hicho, Edward Lowassa ambaye aliitoa wakati wa kampeni za Uchaguzi Mkuu mwaka 2015.

Lowassa aliwaahidi watanzania kuwa endapo angechaguliwa kuwa rais wa Tanzania angemtoa msanii huyo kwasababu mazingira ya kesi yake yalikuwa na utata.

 

Sherehe kufanyika Dodoma

 Wakati huo huo rais ametanga rasmi kuwa kuanzia sasa sherehe za Uhuru zitakuwa zinafanyika mkoa wa Dodoma ambao ni Makao Makuu ya nchi ambapo maamuzi hayo yanaenda sambamba na kuhamishia shughuli za serikali katika mkoa huo ili kutimiza ndoto ya muda mrefu ya kuuboresha mji wa Dodoma.  Awali sherehe hizo zilikuwa zikifanyika katika uwanja wa uhuru jijini Dar es Salaam.

“Sherehe za uhuru wa Tanzania Bara mwaka huu zinafanyika hapa Dodoma ndio Makao Makuu ya nchi na zitaendelea kufanyika hapa na si mahali pengine”, amesema rais.

Awakumbuka walinzi wa amani waliouwawa Congo DRC

Watanzania wametakiwa kuwaombea wanajeshi  44 wa Tanzania walinzi wa amani ambao walijeruliwa katika mashambulizi na waasi wa Kivu nchini Congo DRC. Katika shambulio hilo wanajeshi 14 wamefariki, 8 wako mahututi na wawili hawajulikani waliko.

 Wito huo ameutoa rais Magufuli katika sherehe za Uhuru ikiwa ni ishara ya kuonyesha mshikamano kwa wanajeshi waliopo Congo kuhakikisha nchi hiyo inarejea katika utawala wa kidemokrasia ikizingatiwa kuwa imekuwa na mapigano ya wenyewe kwa wenyewe kwa muda mrefu sasa.

Rais John Magufuli akiwa kwenye gari la wazi wakati akiingia katika viwanja vya Jamhuri mjini Dodoma katika sherehe za miaka 56 ya Uhuru wa Tanzania Bara

 

Mafanikio yaliyopatikana

Mafanikio mbalimbali yamepatikana tangu Tanzania Bara ipate uhuru wake 1961 katika sekta mbalimbali ingawa bado ziko changamoto zinazokwamisha kufikia maendeleo ya kweli.

 Akielezea mafanikio yaliyopatikana rais Magufuli amesema, “ Nchi yetu imepiga hatua kubwa za maendeleo tangu kupata uhuru”,

“Wakati tunapata uhuru baada ya miaka 76 ya kikoloni nchi yetu ilikuwa na mtandao wa barabara wenye urefu wa kilomita 33,600 kati ya hizo kilomita 1,360 tu ndizo zilikuwa za lami. Leo mtandao wa barabara tunao una kilometa 122,500 aidha 12,679.55 ni za lami.

Madaraja ambayo yaliyokwisha kamilika tangu tupate uhuru ni zaidi ya 17. Ukiachia mbali ujenzi wa barabara wakati tunapata uhuru, nchi yetu ilikuwa ina vituo vya kutolea huduma za afya 1,095 leo tuna vituo vya kutolea afya zikiwemo hospitali zaidi ya 7,293.

Wakati tunapata uhuru tulikuwa na shule za msingi 3,100 hivi sasa zipo shule 17,379. Shule za sekondari zilikuwa 41 hivi sasa ziko 4,817, na tulikuwa na chuo kikuu 1 lakini sasa vipo 48. Madaktari waliosajiliwa walikuwa 403 ambapo kati yao watanganyika walikuwa 12 tu leo tuna madaktari waliosajiri 9,343.

Mwaka 1961 wahandisi wazalendo walikuwa 2 tu lakini hadi kufikia mwezi uliopita 2017 nchi yetu imefikisha wahandisi 19,164 waliosajiliwa. Makandarasi walikuwa 2 tu leo tuna makandarasi 9,350.

Hali kadharika, wakati tunapata uhuru wastani wa umri wa mtu kuishi ilikuwa miaka 37 leo hii wastani ni miaka 61”.

 

Historia ya Uhuru wa Tanganyika

Tanganyika ambayo sasa inaitwa Tanzania Bara ilipata uhuru wake 9 Disemba 2017 na kuhitimisha utawala wa kikoloni uliodumu miaka 76. Ikijumuisha  miaka 33 ya utawala wa Kijerumani na miaka 43 ya utawala wa Uingereza .

Harakati za kutafuta uhuru wa nchi yetu ziliongozwa na chama cha Tanganyika National African Union (TANU) ambacho kiliongozwa na Mwalimu Julius Nyerere ambaye kwa kushirikiana na wahasisi wengine wa taifa hili walifanikisha kukombolewa kwa Jamhuri ya Tanganyika mwaka 1961.

TANU kwa kushirikiana na Chama cha Afro Shiraz Party (ASP) , mwaka 1964 walifanikiwa kuuangusha utawala wa Kisultani ambao ulikuwa unaongoza visiwa vya Zanzibar. Mwezi April 1964 Tanganyika na Zanzibar zikaungana na kuunda nchi ya Tanzania yenye serikali mbili yaani ili ya Muungano na Zanzibar.

Mnamo 1977 TANU na ASP viliungana na kuunda Chama cha Mapinduzi (CCM) ambacho kinatawala mpaka sasa chini ya rais wake, John Magufuli.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com