Connect with us

ELIMU

Bajeti yakwamisha malipo ‘baada ya matokeo’ kwa walimu, AZAKI yajitokeza kuwalipa

Published

on

Utulivu na usikivu wa mwanafunzi akiwa darasani ni hatua muhimu ya kupata maarifa kutoka kwa mwalimu anayemfundisha. Lakini  shule zina utaratibu wa kutoa majaribio na mitihani kwa wanafunzi ili kubaini matokeo ya ufundishaji.

Matokeo mazuri ya wanafunzi ni hamasa kwa mwalimu kuendelea kufundisha wanafunzi wake lakini kama wanafunzi hawafikii malengo ya ufaulu yaliyowekwa humuweka mwalimu njiapanda.  Hali hiyo hutegemeana na mazingira yenyewe ya kujifunzia na kufundishia.

Mwalimu akiwekewa mazingira wezeshi uwezekano wa kutimiza majukumu yake ni mkubwa na matokeo ya wanafunzi katika mitihani huwa mazuri. Lakini njia hiyo pekee haiwezi kuleta matokeo mazuri zaidi kama mwalimu hajahamasika na kuwa na hali ya kufundisha.

Kwa kutambua hilo serikali ilianzisha mpango wa kutoa ruzuku kwa wanafunzi na shule zote za msingi nchini ili zisaidie kutatua changamoto mbalimbali. Mkakati huo wa serikali ulianza 2016 ambapo fedha za ruzuku hupelekwa moja kwa moja katika shule husika. Ni juhudi za kupongezwa ikizingatiwa kuwa idadi ya wanafunzi wanaoandikishwa imeongezeka.

Mpango huo unatoa ruzuku ya jumla kwa shule, ambapo huwaacha walimu ambao wanajitolea kufundisha licha ya kuwa mazingira magumu katika shule zao ili kuwasaidia wanafunzi kupata matokeo mazuri ktika mitihani na majaribio ya darasani.

Ni matarajio ya serikali kuwawezesha walimu wote kitaaluma lakini ufinyu wa bajeti hukwamisha mipango ya serikali kumfikia kila mwalimu ili kuongeza ufanisi katika ufundishaji na kupata matokeo ya kuridhisha kwa wanafunzi wake.

               Wananchi wakifuatilia utolewa wa ripoti ya utetekelezaji wa mradi wa KiuFunza jijini Dar es Salaam hivi karibuni.

Taasisi ya Twaweza kupitia mradi wa KiuFunza (Kiu ya Kujifunza) ambao unatekelezwa kwa miaka 5 unalenga kumfikia mwalimu mmoja mmoja ambaye anaonyesha juhudi za makusudi kuwafundisha wanafunzi wafikie malengo yao. Mradi huo ni mahususi kutoa motisha ya fedha kwa walimu ambao wanafunzi wao wameonyesha matokeo mazuri katika ufundishaji.

Lengo hasa ni kuongeza ufanisi na hali ya walimu kufundisha ili kupata matokeo mazuri kwa wanafunzi wa shule zilizochaguliwa. Mradi huo unafanyika kwa majaribio katika shule 67 kwenye Wilaya 11 za Geita, Kahama, Karagwe, Kigoma, Kinondoni, Kondoa, Korogwe Vijijini, Lushoto, Mbozi, Sumbawanga Vijijini na Mbinga.

Katika kipindi cha 2015-2016 mradi huo ulianzisha kipengeleza cha mashindano ya wanafunzi ili kupima uelewa wao wakiwa darasani. Wanafunzi waliohusika ni wale wa darasa la I, II, III hasa katika masomo ya Kiswahili na hesabu.

Kuanzishwa kwa mradi huu kunatokana na utafiti uliofanywa na Twaweza mwaka 2013 na kubaini kuwa, “katika mfumo uliopo hivi sasa hakuna uwajibikaji wa kutosha katika suala la ujifunzaji. Zaidi ya hapo, malipo kwa wasimamizi na walimu hayategemei utendaji wao. Kutokutilia maanani suala la utendaji na motisha inaweza kwa kiwango fulani kuonyesha ni kwanini ongezeko la bajeti ya elimu haichangii kuboresha matokeo ya ujifunzaji”,

Mradi uliweka mkakati ambao unamuwezesha mwalimu kupata kiasi fulani cha fedha ikiwa wanafunzi wake wameonyesha matokeo mazuri katika mashindano ya kupima uelewa.

Ripoti ya mradi wa KiuFunza inaeleza kuwa, “malipo kwa utendaji bora (mashindano) hutumia vipimo viwili kwa kila mwanafunzi. Kwanza hupima kiwango alichopo mwanafunzi mwanzoni mwa mwaka na pili hupima kiwango alichofikia mwishoni mwa mwaka,

Matokeo ya kwanza hutumika kuwaweka watoto kwenye makundi kutokana na uwezo wao. Kila kundi huwekwa wanafunzi wenye uwezo unaofanana. Makundi hayo ndiyo msingi wa mashindano kwa walimu. Wanafunzi kwenye kila kundi ambaye atafaulu kwa kiwango cha juu kwenye jaribio la pili atampatia mwalimu wake bahshishi kubwa”.

Mkurugenzi Mtendaji wa Twaweza, Aidan Eyakuze anasema baada ya mwaka mmoja walibaini matokeo chanya ya utolewaji wa motisha kwa walimu ambapo kiwango cha ujifunzaji kiliongezeka ikilinganishwa na kipindi ambapo motisha ilikuwa haitolewi.

“Matokeo ya kujifunza katika madarasa ya I, II, III, yalikuwa mazuri; tulibaini kuwa viwango vya ufaulu wa Kiswahili na Hesabu viliongezeka kwa asilimia 20 katika kipindi cha mwaka mmoja”, anasema Eyakuze na kuongeza kuwa,

“Motisha kwa walimu inaweza kuwa na matokeo chanya ya kuwavutia watu wenye vipaji/uwezo kuwa walimu”.

 

Mafaniko yaliyopatikana katika nchi zingine

Mradi wa majaribio wa KiuFunza uliwahi kutekelezwa katika nchi ya Brazil hasa jimbo la Pernambuco, ambapo  mpango wa motisha uliwafikia walimu 50,000 katika shule 950 na kuleta matokeo chanya.  Pia nchi ya Chile ilifanikiwa kutoa matisha kwa  walimu baada ya kupata matokeo mazuri kwa shule zote za msingi 6,500 zinazoendeshwa na serikali zilishiriki katika mradi wa majaribio ya hisabati na lugha.

 

Changamoto ya kutoa motisha ya fedha kwa walimu

Kulingana na tafiti mbalimbali zinaeleza kuwa mpango huu wa motisha kwa walimu haujafanikiwa katika baadhi ya nchi kama Kenya, India na Israel kwasababu motisha ilikuwa kidogo kinyume na matarajio ya walimu.

Mwalimu Joseph Mbando mmoja wa watafiti wa mradi wa KiuFunza anasema changamoto iliyopo kwa serikali ya Tanzania kutoa motisha kwa walimu ni ufinyu wa bajeti inayoelekezwa katika sekta ya elimu kila mwaka.

“Bahshishi za KiuFunza ambazo zililipwa kwa walimu wa madarasa ya I, II na III pekee, ilikuwa ni karibu asilimia 3 ya bajeti ya sasa kwa kila shule”, ameeleza Mwalimu Mbando.

Kwa upande wake, Prof.  Marjorie Mbilinyi mwanachama wa Mtandao wa Jinsia Tanzania (TGNP) amesema utafiti huo wa Twaweza umeangazia suala la msingi lakini wanapaswa kuangalia motisha zingine ikiwemo kutoa mafunzo na kuwatambua walimu kwa kazi zao.

Pia ameshauri  juhudi hizo zilenge kutathmini mazingira ya kufundishia na kuhimiza serikali kuboresha miundombinu ya shule na nyumba za walimu ili kuongeza hali na bidii ya kufanya kazi.

Continue Reading
Click to comment

Leave a Reply

Your email address will not be published. Required fields are marked *

ELIMU

Hamasa ya wazazi kufuatilia maendeleo ya watoto shuleni yaongezeka

Published

on

Elimu bora ina faida kubwa kwa maisha ya kila siku ya wananchi na pia huchangia ukuaji wa uchumi. Kwa kutambua hilo, Serikali nyingi katika nchi zinazoendelea na zile zenye uchumi wa kati zimeweka Elimu kuwa kipaumbele katika mipango ya maendeleo.

Tanzania ni miongoni mwa nchi hizo, na Serikali ya awamu ya tano imeipa kipaumbele sekta ya elimu kwa kuongeza bajeti ya elimu kwa trilioni 2.1 kwa sekta ya elimu katika mwaka wa fedha 2017/18 ukilinganisha na trilioni 1.7 zilizotengwa mwaka 2015/2016.

Lakini mafanikio ya elimu yanategemea wadau mbalimbali kutekeleza wajibu wao ili kufikia lengo la kuwaelimisha watoto ambapo wazazi au walezi ni miongoni mwa wadau hao. Utafiti mpya uliotolewa unaonesha mwamko wa wazazi kufuatilia maendeleo ya wanafunzi na shule umeongezeka ukilinganisha na miaka iliyotangulia.

Taasisi ya Twaweza katika utafiti wake; Elimu bora au bora elimu? Uliotolewa Mei, 2018 unaeleza kuwa Wazazi 7 kati ya 8 wenye watoto wanaosoma shule za msingi ambao ni sawa na asilimia 85 wanasema walikutana na walimu wa watoto wao angalau mara moja au mbili mwaka uliopita – na karibu idadi sawa na hiyo (86%) wanasema walitembelea shuleni kwa watoto wao angalau mara moja katika kipindi hicho hicho (haijaoneshwa kwenye jedwali).

Takwimu hizi zilikusanywa kutoka kwa wahojiwa 1,786 katika awamu ya 23 ya kundi la pili la Sauti za Wananchi, na zilikusanywa kati ya 25 Septemba na 15 Oktoba mwaka 2017 ambapo idadi ya kukutana kwa mzazi na mwalimu imeongezeka kutoka mwaka 2016 hadi 2017.

 

Lakini wazazi wengi wa watoto ambao wanasoma katika shule za msingi wanaamini njia pekee ya kuchangia maendeleo ya watoto wao ni kuwatunza na kuwalea katika maadili sahihi bila kusahau kuwafunza nidhamu watoto wao ili wawe wasikivu kwa walimu wao.

Kaya zenye watoto wanaosoma shule za msingi huwaadhibu watoto wao kama njia mojawapo ya kuusaidia uongozi wa shule (52%),” inaeleza ripoti ya utafiti huo.

Pamoja na hayo, idadi kubwa ya wazazi wanaona wana wajibu wa msingi wa kuhakikisha watoto wao wanajifunza lakini wanafikiri walimu ndio wenye jukumu kubwa la kufanikisha elimu ya watoto.

Utafti huo umeonyesha kwamba wazazi wako tayari kuchangia katika uboreshaji wa mazingira ya walimu ili wafudishe kwa ufanisi na kuwasaidia watoto wao kufanya vizuri katika mitihani.

Mkurugenzi wa Twaweza, Aidan Eyakuze akitoa maoni yake kuhusu utafiti huo, amesema wazazi wameongea kwa uwazi; wanajali zaidi ubora wa elimu kuliko gharama za kuipata elimu hiyo. Inawezekana kwamba mtazamo huu unetokana na changamoto za sasa katika sekta ya elimu kufuatia ongezeko la idadi ya watoto shuleni baada ya kufutwa kwa ada.

Ni vema viongozi wa ngazi zote wakayazingatia maoni haya ya wananchi wakati wa kuandaa na kutekeleza sera za elimu,” amesema Eyakuze.

Mbunge wa zamani wa Bunge la Afrika Mashariki, Dk Perpetua Nderakindo anasema haitakiwi kuitegemea Serikali peke yake katika kuboresha elimu hivyo ni lazima kuwe na ushirikiano wa pamoja na uwajibikaji katika kutengeneza mfumo wa elimu nchini utakaozaa matunda yanayotakiwa katika Taifa.

Dunia ya sasa inahitaji ushirikiano na naamini wazazi wanataka elimu bora kwa watoto wao hivyo ushirikiano, uwajibikaji na uwekezaji ni vya muhimu katika elimu yetu,” anasema Dk Nderakindo.

Hata hivyo, baadhi wanaeleza kuwa usimamizi mzuri wa shule nchini utasaidia kurudisha ubora wa elimu itakayowaandaa vijana kukabiliana na changamoto za ulimwengu wa sasa.

Meneja wa Utafiti na Sera wa asasi ya kiraia ya Haki Elimu, Bonaventure Godfrey amesema suluhisho ya changamoto hizo katika elimu mojawapo ni usimamizi bora wa shule nchini.

Anaeleza kuwa shule zote za msingi na sekondari zikisimamiwa vyema kwa Serikali kuwajibika ipasavyo wananchi au wazazi nao watawajibika.

Continue Reading

Afya

Vyakula hivi vitakulinda dhidi ya athari za kiafya za uchafuzi wa hewa

Published

on

Tunaishi katika ulimwengu unaokabiliwa na athari kubwa za mabadiliko ya hali ya hewa. Moja ya athari hizo ni kuongezeka kwa joto na kupungua kwa mvua katika maeneo mbalimbali. Athari hizi zinagusa moja kwa moja afya ya binadamu.

Ripoti ya mabadiliko ya hali ya hewa ya mwaka 2017 imeonesha kuwa kuongezeka kwa joto kunaathiri afya ya binadamu kwa kiasi kikubwa. Ripoti hiyo inatoka kundi la vyuo mbalimbali na mashirika tofauti ya Umoja wa Mataifa inasema watu wengi wanaathirika na joto pamoja na mlo hafifu sambamba na kusambaa kwa magonjwa.

Moja ya kisababishi cha mabadiliko ya hali ya hewa ni uchafuzi wa anga. Uchafuzi wa anga ni kuchanganyika kwa hewa asili katika anga na vitu kama vile moshi, majivu, gesi za kemikali katika hali na kiwango ambacho huathiri sifa ya hewa na kusababisha madhara kwa binadamu na viumbe vingine.

Baadhi ya vitu na vitendo huathiri vibaya anga letu. Baadhi ya vitu hivyo ni kama gesi na moshi unaotoka kwenye viwanda, moshi kutoka kwenye magari, marashi, dawa ya kuuwa wadudu shambani na kadhalika.

Lakini umewahi kujiuliza kuwa aina ya chakula unachokula kinaweza kukusaidia kukabiliana na athari za kiafya zinazotokana na uchafuzi wa hewa?

Wanasayansi katika utafiti wao uliotolewa hivi karibuni, wanaeleza ulaji wa chakula cha Mediterania ( Mediterranean diet) chenye matunda mengi, mbogamboga, nafaka isiyokobolewa, samaki, maharage jamii ya soya, mafuta ya mizeituni na mayai yanaweza kuwalinda watu dhidi ya athari za afya zinazotokana na uchafuzi wa hewa.

Wanasayansi hao kutoka Shule kuu ya Udaktari ya NYU ya Marekani, walichambua data za watu takribani 550,000 wenye wastani wa umri wa miaka 62 kwa miaka zaidi ya 17 ambapo waliwapanga watu hao kwenye makundi kulingana na ulaji wao unaoendana na chakula cha Mediterania na kulinganisha na muda waliokaa kwenye hewa iliyochafuliwa.

Walibaini kuwa watu ambao walizingatia kula vyakula vilivyotajwa hapo juu walikuwa na uwezekano mkubwa wa kuepuka magonjwa na vifo vinavyotokana na uchafuzi wa hali ya hewa. Magonjwa hayo ni yale ya mfumo wa upumuaji, moyo na kansa.

                                   Vyakula  jamii ya Mediterania

Vyakula hivyo jamii ya Mediterania vina uwezo mkubwa wa kukabiliana na vimelea vya maambukizi ya magonjwa kwa mtu ambaye atazingatia kwa usahihi kutumia katika maisha yake.

Uchafuzi wa hewa unasababisha athari mbaya za kiafya kupitia hewa ukaa na mlo wa Mediterania una virutubisho muhimu kupambana na vimelea vya magonjwa,” anasema Mwandishi Mtafiti wa utafiti huo, Chris Lim wa Chuo cha NYU.

Lim anasema vyakula vya aina nyingine vinaweza kusaidia kukabiliana na athari hiyo. “Nilipoangalia kila mchanganyiko wa chakula cha Mediterania, kina matunda, mbogamboga na mafuta yanayoweza kupambana na athari za hewa chafu,” anasema.

Utafiti kuhusu ulaji kama unaweza kuzuia athari za kiafya za uchafuzi wa hewa bado haujahakikiwa na kukubalika kisayansi. Lakini utafiti huo sio wa kwanza kutafuta uhusiano wa mlo na athari za kiafya za uchafuzi wa hali ya hewa.

Wakala wa Uhifadhi wa Mazingira wa Marekani (U.S. Environmental Protection Agency (EPA)) unatafiti kama mlo unaweza kumlinda mtu dhidi ya athari za uchafuzi wa mazingira. Pia wanatafiti ili kujiridhisha kama virutubisho hivyo vinaweza kutumika badala ya dawa za kitabibu na kwa kiasi gani mtu anatakiwa apate virutubisho hivyo kumhakikishia usalama dhidi ya uchafuzi huo.

Hata hivyo, bado watu wanashauriwa kutumia zaidi matunda na mbogamboga kwenye milo yao ya kila siku ili kupata faida mbalimbali za kiafya.

Continue Reading

ELIMU

Sababu 6 zinazothibitisha kwanini kukosolewa ni jambo zuri

Published

on

Mark Thomas anasema, kukosolewa kunaweza kuwa kitu kizuri bila kujali imetoka kwa mtu wa aina gani au anayefanya kazi gani.

Kukubali kukosolewa yaweza kuwa jambo gumu sana. Katika nafasi fulani katika ulimwengu huu unaotegemea mawazo na maoni, utakutana na mtu yeyote (anaweza kuwa mteja, hadhira au hata msomaji tuu) ambaye atataka kukwambia namna ya kufanya mambo yako kwa namna nzuri zaidi.

Yaweza kuwa vigumu kukabiliana na hali hiyo; ukizingatia kwamba hakuna mtu anayependa kuambiwa anakosea.

Sio wakati wote kukosolewa ni kubaya kwasababu wakati mwingine unaweza kutumia kukosolewa huko katika kujiboresha kitaaluma. Fahamu sababu sita zinazothibitisha kuwa kukosolewa ni jambo zuri:

Kukosolewa ni namna ya mawasiliano

Inapotokea mtu anakukosoa inamaanisha kwamba anataka kukupa mrejesho kuhusu huduma unayotoa na hii inaweza kuwa nafasi nzuri ya kujifunza kuhusu watu unaofanya nao kazi na jinsi ya kuwafanya wawe wateja wanaorizika na kazi yako.

Chukua muda kufikiria kile wanachokisema watu kabla hujajibu chochote, maana kwenye biashara au kufanya kazi na mtu ambaye yupo tayari kukosolewa na kufanyia kazi kile anachoambiwa humaanisha pande zote mbili zinaweza kufanya kazi kwa pamoja kufikia mafanikio mazuri. Uzalishaji unamaanisha kujua kile ambacho wateja wako wanataka.

 

Mrejesho hukusaidia kuboresha huduma zako

Unapodhani kwamba unachokifanya kipo sawa lakini hupati mrejesho wowote kutoka kwa watu, unakuwa na uhakika kiasi gani kama unachokifanya kina uzuri wowote? Haijalishi unajishughulisha na nini, kusikiliza na kufanyia kazi mrejesho unaoupata kutoka kwa wateja wako kutakusaidia kujua kipi ni kizuri na kipi kiboreshwe zaidi.

Tumia taarifa unazozipata kuboresha kile unachokifanya, inaweza kuwa vigumu kusikiliza kauli hizo zinazoumiza lakini itafanya unachokizalisha kiwe imara katika uzalishaji wake.

 

Hukufanya ufikirie kuhusu utendaji kazi wako

Kukosolewa kunakojenga huweza kukufanya uachane na utendaji mbovu na kuhamia kwenye mzuri. Jaribu kuwa na malengo na chukulia kile unachokizalisha kama vile sio cha kwako.

Hii inaweza kuwa ngumu hasa pale ambapo unahusika kwa kiwango kikubwa kwenye kile unachokifanya, lakini ukijaribu kufikiria zaidi unaweza kugundua namna ambavyo utaweza kuboresha namna ya utendaji kazi wako na kuzuia kushindwa kwa namna yoyote ile wakati wa kazi.

Jaribu kuangalia kama kuna taarifa yoyote ya ziada unayoihitaji? Je, kuna kitu umekisahau wakati ulipouanza huo mradi? Je, kazi inaweza kumalizika kwa muda uliopangwa awali?.

 

Kukosolewa kunakofaa kunaweza kukuletea manufaa

Fikiria pale inapotokea ukapata mteja ambaye yupo tayari kukwambia namna ya kumuhudumia vizuri; na wewe tuu ndio ukawa na taarifa hizi.

Hii hukuweka katika nafasi nzuri kwenye soko kuliko mtu mwingine yeyote na huweza kutumika siku za usoni ili kuboresha vitu na kuvipata kwa haraka. Jitahidi kutafuta taarifa hizi kutoka kwa wateja wako na kuwafanya wawe wazi kwako kuhusu kile wanachokitaka.

 

Tumia lugha nzuri, kusababisha suluhu

Lugha unayoitumia kujibu pale unapokosolewa ni ya muhimu sana. Jitahidi kuepusha ugomvi katika kujibu kwako. Badala yake badilisha kujibu kwako kuwa katika mazungumzo kuhusu namna ya kulikabili tatizo.

Hii itakufanya ubaki kwenye nafasi nzuri katika kazi yako na hautapoteza muda mwingi kuwaza kuhusu nini kifanyike ili kurekebisha mambo.

Yaweke maneno yako katika vitendo ili kuonesha kwamba unakubali kukosolewa, toa mrejesho wako kwa namna nzuri na fanikisha kukamilisha kazi yako.

 

Usichukulie kukosolewa kama shambulio binafsi

Inapotokea mtu hajaipenda kazi yako kwa mara ya kwanza usichukulie kwamba mtu huyo anakuchukia.

Hata pale unapokosolewa kwa kuonewa usiwe mwepesi kujibu kwa haraka na kwa hasira maana unaweza kuharibu uhusiano wako wa kazi na mtu huyo na inaweza kukuharibia sifa nzuri uliyonayo kwenye soko.

Kuna wakati kukosolewa kunaweza kuonekana kama shambulio binafsi, na wakati mwingine utakuwa sahihi kuwaza hivi. Tambua kwamba watu hukosea hivyo ni muhimu kukumbuka kutoruhusu maoni ya watu kukukasirisha.

Hata hivyo mtu makini anaweza kupokea kukosolewa kwa aina yoyote ile na akatoa mrejesho mzuri hata kama kukosolewa kwake kumekuwa ni shambulio binafsi kwake.

Watu wa aina hii wanaweza kutumia nafasi hiyo kwa manufaa yao, na kama itashindikana kabisa vunja mkataba wa kufanya kazi na mtu huyo kwa namna nzuri na kuacha sifa yako katika soko ikiwa bado ni nzuri.

Continue Reading

Muhimu Kusoma

Copyright © 2020 FikraPevu.com