Connect with us

Jamii

Janeth na kilio cha watoto yatima

Published

on

MACHOZI ya mwanafunzi Janeth Julius (16) yanahitimisha mahojiano kwani sikuwa na ujasili wa kuuliza swali jipya. Yalibeba hisia za uchungu na ujumbe mzito uliowakilisha kilio cha watoto wa kundi lake.

Sikujua kuwa hakuwahi kupita kwenye mikono salama wala kuonja malezi ya wazazi. Pengine aliamini swali nililomuuliza lisingeleta ufumbuzi wa matatizo anayokabiliana nayo kwa sasa. Chozi la mtoto yatima.

Ni mwanafunzi wa kidato cha pili Sekondari ya Lake View iliyopo mjini Bukoba na amefika hapa alipo kwa juhudi za kaka yake ambaye ni mtoto mwenzake. Walipoteza wazazi wakiwa wadogo na huo ukawa mwanzo wa kuishi peke yao.

Ndani ya nyumba dhaifu ya udongo katika kijiji cha Buhanga wilayani Muleba,waliweza kuendesha maisha yao na baada ya Julian kaka yake kumaliza darasa la saba alielekea mjini Bukoba kwa shingo upande akimwacha nyuma mdogo wake.

Janeth pichani

Baada ya Janeth kumaliza darasa la saba hakuchaguliwa kuendelea na masomo, kaka yake alimleta mjini na kumtafutia shule binafsi ya sekondari huku akitegemea mapato ya uendeshaji wa pikipiki za abiria ili kulipa ada na mahitaji mengine.

Nilifahamiana na kijana huyu baada ya kunisafirisha kwa pikipiki mara kadhaa, sasa tumezoeana. Ananieleza jinsi alivyolemewa na malipo ya ada ya mdogo wake wakati huo akilazimika kukabiliana na ugumu wa maisha ya mjini.

Biashara anayoifanya sio endelevu wala sio mradi wake ingawa ndiyo tegemeo pekee la kuwawezesha kukidhi mahitaji yote. Hakuwahi kufikia ngazi hiyo ya elimu ingawa anatambua umuhimu wa elimu kwa mdogo wake.

Ndoto ya Janeth
Angependa kuwa Mwanasheria ingawa safari ya kufikia mafanikio hayo tayari imezingirwa na vitisho na wiki moja iliyopita alisimamishwa masomo kutokana na deni la ada ya shule wakati huo wenzake wakiwa katika maandalizi ya mtihani.

“Siku zote nafikiria kufukuzwa shule kwa ajili ya ada namtegemea kaka kwa ajili ya mahitaji yote ya shule napenda kusomea sheria,nitawatetea watoto wenye shida kama mimi”anasema Janeth

Yapo mamia ya wanafunzi wenye ndoto kama hii ingawa msingi wa ndoto ya Julieth umejengwa kupitia changamoto nyingi zaidi. Waliishi kwa upendo kama familia ya watoto wanaojilea, kwa umri wao mdogo walibeba majukumu yote.

Walijengewa matumaini ya muda kwa kutembelewa na wageni kupitia mashirika waliofika kushangaa watoto wanaojilea. Walipewa misaada ya muda isiyoweza kukidhi ndoto ya sasa.Baadhi walisaidia kukarabati nyumba yao ya udongo.

Wanawakumbuka wageni waliopitia shirika la World Vision Kanda ya Kagera,waliopelekwa katika familia hii kuthibitisha ukubwa wa tatizo la watoto yatima.Walipigwa picha na kupewa chakula bila kuwekewa mipango endelevu.

Wanawakumbuka wageni baadhi wakiwa raia wa nje. Pamoja na kazi kubwa ya mashirika ya aina hii bado hayawaandai watoto watakaofanya kazi ya utetezi katika ofisi zao kama ilivyo ndoto ya mwanafunzi huyu.

Utetezi wao ungesukumwa na mazingira halisi waliyopita kwa nadhalia na vitendo.Hii ndiyo sababu ya ndoto ya Janeth ambaye familia yao ilitumika kama shamba darasa na leo hawana chochote cha kujivunia.

Mwanafunzi huyu anasema kutokana na uwezo mdogo wa kaka yake hawezi kujiunga na masomo ya ziada’tuition’na baada ya kutoka shuleni hujishughulisha na kazi za nyumbani huku wenzake wakiendelea kujifunza.

Anasema anafikia hatua ya kukosa hata mahitaji madogo kama madaftali na vitabu na kuwa changamoto hizo hazijamfanya kufikia hatua ya kukata tamaa ya kufikia ndoto yake akikumbuka mahangaiko makubwa ya kaka yake.

Kwa kauli yake anaomba watu watakaomsaidia kufikia matarajio yake na kuwa hali ya kusimamishwa masomo kila mara kutokana na kukosa malipo vinachangia kutofanya vizuri zaidi darasani.

Kauli ya shule.
Pamoja na uongozi wa shule ya Lake View kusifu jitihada zake darasani na kuwa sio miongoni mwa wanafunzi wakorofi wanasema suala la malipo halina mjadala kwani shule inategemea malipo hayo kujiendesha.

Mratibu wa shughuli za shule hiyo Samwel Rutanjuka anasema wanafahamu wanafunzi wao wanatoka katika mazingira tofauti na kutaka serikali iwe na mipango maalumu ya kuwasaidia  watoto wa aina hiyo.

Mwanafunzi Janeth (kushoto) akiwa na wenzake wakifuatilia moja ya kipindi darasani katika shule ya sekondari Lake View.

Uzoefu wake wa kuwa mkuu wa sekondari mbalimbali nchini safari aliyohitimisha mwaka 2007 katika shule ya Kahororo ya mjini Bukoba unamfanya alione tatizo ndani ya serikali la kushindwa kuwatambua wanafunzi wenye mahitaji maalumu ya elimu.

“Hata katika shule za serikali matatizo ni yale yale,katika selection(uchaguzi wa wanafunzi)lazima serikali itambue kuwa kuna watoto wasio na uwezo na wana haki ya kusoma,wanataka walipe ada wakati hawana uwezo wa kuwatambua”anabainisha Rutanjuka

Alilaumu kauli za kisiasa ambazo huwachonganisha wazazi na wakuu wa shule kuwa majukwaani hutoa maelekezo ya kutokuwepo baadhi ya malipo tofauti na taratibu za serikali zinavyoleza juu ya ukusanyaji wa michango yakiwepo malipo ya ada.

Akizungumzia changamoto zinazomkabili mwanafunzi Janeth alionyesha kusikitishwa na mazingira magumu ya kusaka elimu yanayomkabili na kuwa hali ya kusimamishwa masomo mara kwa mara itakuwa inamwathiri kisaokolojia.

“Mwanafunzi huyu anaweza kuwa hazina kubwa kwa taifa,umasikini wake usiwe sababu ya kukatisha masomo serikali lazima ifikirie upya jinsi ya kuwasaidia watoto wa aina hii”anasema Mratibu huyo wa shule.

Baadhi ya viongozi na wanaharakati mbalimbali wamefika hapo walipo kutokana na michango ya kudunduliza na hata wengine kufanikiwa kunusa kuta za vyuo vikuu.

Habari hii imeandikwa na mwandishi wa FikraPevu Phinias Bashaya aliyeko mkoani Kagera

Saidia ndoto ya Janeth iwezekane. Namba ya shule 0282221542 na kaka yake 0754778915.

Continue Reading
3 Comments

3 Comments

  1. Beda B.M.

    13/09/2011 at 8:28 pm

    Tatizo hili ni kubwa sana kwa wanafunzi wengi wa kitanzania.

    Naamini kama Serikali yetu ikiweka mkakati makini, itaweza kubaini watoto wenye matatizo hayo na kuona ni kwa jinsi gani wanaweza kusaidiwa. Zoezi hili linaweza kuratibiwa kuanzia ngazi ya Serikali za mitaa ambako ndiko watoto wa namna hii wanaishi na wanajulikana.

  2. steve

    20/09/2011 at 3:38 pm

    Jamii ishikamane kwa pamoja katika kuwsaidia watoto wa jinsi hii kama Janeth, kwani tukiungana pamoja matatizo kama haya yanakuwa mepesi.

  3. gratia msaki

    15/02/2012 at 1:18 pm

    Tatizo hili ni kubwa hasa hapa Tanzania ni jukumu la wote kuwasaidia watoto yatima. Serikali iwaangalie watoto yatima kwani ndiyo Tegemoeo la Taifa kwa baadae.

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com