Connect with us

Jamii

Baada ya Kilio cha Muda mrefu: Kero ya maji Kimara kufikia ukingoni

Published

on

WAKAZI wa Kimara, Dar es Salaam, hasa eneo la Kitunda, wamekuwa na kilio cha muda mrefu kutokana na kukumbwa na adha ya ukosefu wa maji ya kutosha katika baadhi ya maeneo kwa takribani miaka sita sasa.

Licha ya kuwepo kwa mikakati za viongozi na huduma mbalimbali za serikali kutekeleza sera yake ya maji kumwezesha kila mwananchi anaondokana na uhaba wa maji nchini, lakini bado idadi kubwa hainufaiki na huduma hizo katika maeneo mbalimbali ya Kimara.

Katika Jiji la Dar es Salaam, eneo kubwa linalopata maji linahudumiwa na Kampuni ya Dawasco, ambayo iko chini ya Mamlaka ya Majisafi na Majitaka Dar es Salaam, Dawasa.

FikraPevu imefika katika Kata ya Saranga, Mtaa wa Kimara Matangini, eneo la Kwa-Salema na kushuhudia mabomba yaliyowekwa kwenye baadhi ya nyumba yakiwa kama mapambo kwa kukosa maji kwa kipindi kirefu.

Beatrice James (65), ameiambia FikraPevu juu ya kilio cha maji mtaani humo na kwamba kukosekana kwa muda mrefu kumewafanya wakazi “kuzoea tu.”

“Kweli tumekata tamaa, tumepeleka malalamiko yetu kwa viongozi wa serikali za mitaa, hasa wajumbe wetu ambao ndio wanaoonekana kuwa karibu na kuyasikiliza matatizo yetu, lakini hali bado ni ileile kwani ikitokea tatizo kupatiwa ufumbuzi huwa ni kwa muda mfupi na baadaye hali hujirudia” anasema Beatrice

Aidha, anasema kukosekana kwa maji kumefanya maeneo mengi kuwa machafu na kutishia kuwepo kwa magonjwa ya milipuko, hasa kipindupindu.

Beatrice anasema pia ukosefu wa maji huhatarisha usalama wa wanawake, hasa wanapoadamka kwenda kusaka maji kwa ajili ya matumizi ya familia.

Wanawake wengi hulazimika kuamkausiku wa manane au alfajiri kutafuta maji kwa ajirani au kuyafuata visimani.

Idadi kubwa ya wakazi wa eneo hilo, hupata maji mara moja tu kwa wiki, siku ya Alhamisi na hutoka kwa saa chache, mara nyingi zisizozidi nane na pengine hayatoki hadi Dawasco wasemwe sana au watu kuandamana.

Vilevile, mkazi mwingine anatoa masikitiko yake kuhusu bei ya maji isiyoendana na hali halisi ya kipato cha wakazi wa maeneo hayo, ambao wengi wana kipato cha chini. Katika maeneo haya dumu la lita 20 huuzwa kwa Sh. 500 hadi 1,000, huku mnunuzi akitakiwa kuongeza Sh. 200 kwa kila dumu kama ghalama ya ubebaji.

Hali hii inamsukuma kuiomba serikali kulifumbulia macho suala hili kwa kuwezesha miundombinu haraka ya kuweza kuwafikishia maji ya uhakika inatekelezwa.

FikraPevu ilipozungumza na mjumbe wa shina namba 16 Kimara Matangini eneo la kwa Salema, Anyingisye Mwasaga, anaulalamikia uongozi wa Dawasco, hasa mkoa wa maji Kimara kwa kushindwa kutekeleza majukumu ya kazi zake wakati wanapopelekewa matatizo kutoka kwa wananchi.

“Ndani ya mwaka huu, nimeandika barua mbili, nikiwataka Dawasco kuwapatia maji wananchi, ambao tayari wamefungiwa mita kwa muda mrefu bila huduma,

lakini hadi sasa wako kimya ” mjumbe huyo ameijulisha FikraPevu

Anabainisha pia kupokea malalamiko ya wakazi anaowaongoza katika eneo lake kwa kuletewa bili za maji zinazoonekana kuwa juu kuliko maji yanayotumika au bila kutumika kabisa.

Kwa upande mwingine, anatoa kilio chake kwa uongozi wa Dawasco kwa kuwahamisha wafanyakazi wake mara kwa mara, hali inayosababisha ufuatiliaji wa malalamiko ya wananchi kuanza upya kutokana na ugeni wa watumishi na mfumo mbovu wa kuweka kumbukumbu.

Vilevile, Mwasaga anaoanisha tatizo la kutokuwa na diwani wa kata na adha ya maji, kwamba ni kigezo kimojawapo cha kutosikilizwa vyema pindi akiwasilisha malalamiko Dawasco, kwani barua zake huonekana kutokuwa na nguvu na hivyo kutekelezwa.

Pia wakazi wa Kimara wanatoa mwito kwa mbunge wao wa Jimbo la Kibamba, John Mnyika kulifatitilia kwa karibu suala hili na kumtaka kusikiliza kilio chao kwani tangu aingie madarakani, hajawahi kuwatembelea kusikiliza kero zao.

FikraPevu haikuishia hapo, imefika ofisi za Dawasco – Mkoa wa Maji wa Kimara na kukutana na meneja wake, Emmanuel Zabron ambaye anakubali kuwepo kwa upungufu wa maji unaosababisha kero katika kata hiyo, lakini analitaja kuwa tatizo la mtu mmojammoja na sio kwa wakazi wote wa Kimara Matangini.

Pia analaumu uwasilishwaji wa malalamiko kutoka kwa wananchi yanayoletwa kupitia viongozi wao na badala yake anahimiza kila mwananchi anapaswa kufika ofisini na malalamiko binafsi kwani kila nyumba inakuwa na matatizo tofauti na nyingine.

“Inatuwia ngumu kushughulikia malalamiko ya watu kwa ujumla kupitia viongozi wao kwa njia ya kutuandikia barua, kwani mara nyingi mahitaji yanakuwa tofauti, ni vyema mtu akafika ofisini kueleza shida yake binafsi, hii itakuwa rahisi pia kumfikia kwa haraka”

Aidha, Emmanuel anakanusha kwamba ofisi yake imekuwa haifuatilii kero za maji na anaitupia lawama jiografia ya eneo hilo  kutokuwa rafiki kwa watendaji wake, kuwa sehemu ya Kimara  ni mabonde, miinuko na vilima.

Hali hii anaitaja kuwa chanzo kikubwa cha uhaba wa maji, kwani wakazi wanaoishi sehemu za vilimani ni vigumu kutokana na uchache wa maji uliopo mitamboni, ikilinganishwa na idadi ya watumiaji kuwa wengi.

Akiongelea suala la wateja wanaodai kulipishwa kiasi kikubwa cha Ankara (bili), anasema kwa sasa wamefungiwa mita mpya ambazo zinasoma maji kwa usahihi.

Emmanuel anaifahamisha FikraPevu juu ya kukoma kwa kero ya maji Kimara kabla ya Desemba 25, mwaka huu kutokana na kupanuliwa kwa chanzo cha Ruvu Juu na ujenzi wa bomba kuu hadi matanki ya Kibamba na Kimara.

“Hivi sasa miundombinu imekamilika, mabwawa tayari yamejengwa na yatapata maji kutoka bomba jipya la Ruvu juu. Kazi imebaki kwa mkandarasi, ambaye anaunganisha umeme wa kutosha kusukuma maji.”

Endapo kauli ya Emmanuel itakuwa sahihi, ni wazi kuwa wakazi wa Kimara watanufaika na kudhihirisha kuwa dira ya Taifa ya Maendeleo 2025 inatekelezwa kwa vitendo kuhusu huduma ya maji.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com