Connect with us

Siasa

Maofisa Ugani: Kada muhimu sekta ya kilimo inayosahaulika. Ni wachache na hawana vitendea kazi

Published

on

MAOFISA ugani ni miongoni mwa kada ya uongozi na wataalam wanaonyooshewa vidole kuwa chanzo cha kuzorota kwa kilimo chenye tija kwenye mazao ya chakula na biashara, pamba ikiwemo, FikraPevu inaripoti.

Licha ya kuajiri robo tatu ya Watanzania zaidi ya 20 milioni wenye uwezo wa kufanya kazi, mchango wa sekta hiyo bado hauridhishi kutokana na sababu kadhaa.

FikraPevu inafahamu kwamba, moja ni kuendeleza kilimo cha utamaduni ambacho siyo tu kinategemea misimu ya mvua, bali kinatumia zana duni na matumizi hafifu ya elimu na pembejeo za kisasa.

Zipo sababu kadhaa zinazosababisha wakulima wengi kuendeleza kilimo cha utamaduni, kubwa ni kukosa ushauri wa kitaalam kutoka kwa Maofisa Ugani wakati wa maandalizi ya shamba, uchaguzi na ununuzi wa mbegu, kupanda, matumizi sahihi ya pembejeo na uvunaji.

Lawama nyingi kuhusu kukosekana huduma ya ugani huelekezwa kwa maofisa ugani ambao wanatuhumiwa kukaa maofisini badala ya kuwatembelea wakulima mashambani.

Hata hivyo, uchunguzi wa kina wa FikraPevu uliohusisha mahojiano na wakulima, Maofisa Ugani, viongozi na watendaji katika ngazi ya vijiji, kata na wilaya unagundua kuwa kitendo cha wakulima kukosa ushauri wa kitaalam kuhusu kilimo chenye tija kina makandokando mengi zaidi ya lawama za Maofisa Ugani kutofika vijijini.

Kwanza, kada hiyo ni kati ya watumishi wa umma ambao idadi yao haitoshelezi wala kulingana na mahitaji halisi. Ni wachache!

Licha ya uchache wao, kada hiyo ya Maofisa Ugani pia imetelekezwa siyo tu kimaslahi, bali hata kwa kutopatiwa nyenzo na vitendea kazi kuwawezesha kutekeleza wajibu wao.

Hii inadhihirishwa na ukweli kwamba licha ya kuhitajika kupatikana angalau Ofisa Ugani mmoja kwa kila kijiji (kama siyo kila kitongoji kwa maeneo makubwa kiutawala), kada hiyo hivi sasa wanapatikana kwenye ngazi ya kata.

Hata baadhi ya kata hazina huduma ya Maofisa hao kiasi kwamba walioko kata jirani kulazimika kuhudumia kata nyingine.

Baadhi ya maofisa hao hulazimika kuhudumia vijiji hadi 10 kwa Kata moja au zaidi, huku wakitembea zaidi ya kilometa 10 kwenda na kurudi kuhudumia wakulima.

 

Maofisa ugani hawataki kuishi vijini kuhudumia wakulima?

“La hasha! Tunapenda na hakika ndiyo furaha na fahari yetu kwa sababu huko ndiko tunakoonyesha ujuzi na uwezo wetu. Tungependa kuishi na wakulima vijijini ambako ndiko fani yetu inahusika,” anaanza kujibu swali hilo Ofisa Ugani wa Kata ya Malya, Wilaya ya Kwimba, mkoani Mwanza, Hamisi H. Mzee.

Kuhusu lawama kwamba wanashindwa kuwatembelea wakulima, Mzee anasema: “Wengi wetu hatuwezeshwi. Siyo tu kwa usafiri wa kuwafikia wakulima, bali hata kwa motisha ya kufanya hivyo.”

Anasema wapo Maofisa Ugani wanaolazimika kutembea kwa miguu umbali wa zaidi ya kilometa 10 kwenda na kurudi kila siku kuwatembelea na kuwashauri wakulima ili kuongeza tija kwenye kilimo.

“Baadhi kama mimi niliyemudu kununua pikipiki yangu binafsi tunamudu kuwatembelea wakulima. Tena kwa gharama zetu kuanzia mafuta na matengenezo ya chombo,” anasema Mzee akionyesha pikipiki yake aliyoinunua miaka sita iliyopita.

Anamshukuru Mkuu wa Wilaya ya Kwimba, Mtemi Msafiri, kwa kuunda Kikosi Kazi Maalum kuhamasisha kilimo cha pamba, na kufanikisha upatikanaji wa pikipiki kutoka kwa makampuni ya pembejeo ambazo zimegawanywa kwa Maofisa Ugani.

“Kwa juhudi za Mkuu wa Wilaya tumewezeshwa angalau lita 36 za mafuta kufanikisha shughuli za uhamasishaji wakati wa maandalizi ya mashamba, kilimo na upandaji wa pamba,” anasema Mzee katika mahojiano na FikraPevu.

Anasema msimu huu, Maofisa Ugani kwa kushirikiana na Kikosi Kazi Maalum kuanzia ngazi ya Wilaya, Kata na Vijiji wamefanikisha kurejesha ari ya kilimo cha pamba wilayani Kwimba.

“Kata yangu ya Malya pekee tumelima zaidi ya ekari 748.5 za pamba kutokana na uhamasishaji wa Vikosi Kazi kuanzia ngazi vijiji, kata hadi wilaya,” anasema.

Hata hivyo, ni ekari 369 pekee ndizo zilizoota, wakati 322 hazikuota kutokana na changamoto ya mbegu na mvua zisizoridhisha, na ekari 46 hazikupandwa kabisa baada ya mvua kukatika mapema.

Licha ya kuhamasishwa, baadhi ya wakulima pia waliamua kugeukia mazao mengine kama choroko, dengu, alizeti, mpunga na mahindi.

 

Pikipiki kwa maofisa maofisini badala ya Maofisa Ugani

Akizungumzia kwa sharti la kutotajwa jina, mmoja wa wataalam katika Idara ya Kilimo wilayani Kwimba anashauri pikipiki zilizogawanywa kwa maofisa walioko Makao Makuu ya Halmashauri zipelekwe vijijini kwa maofisa ugani ili kuongeza huduma kwa wakulima.

“Pikipiki zina uwezo wa kuhimili mazingira ya vijijini zisitumike kama usafiri wa kwenda na kurudi kazini kwa maofisa. Zitaleta tija zikipelekwa vijijini kukuza sekta ya kilimo kupitia huduma ya ugani kwa wakulima,” anashauri mtaalam huyo.

 

Upangaji wa bei, gharama za uzalishaji

“Bei ya kununua pamba izingatie gharama halisi ya uzalishaji. Hii siyo tu itawapa pato la uhakika wakulima, bali pia itaongeza ari wengi kulima pamba,” hiyo ni kauli ya Mkulima Mshauri kutoka Kijiji cha Kiliaboya, Ngulimi John.

Anapendekeza bei ya sasa ya msimu uliopita ya Shs. 1, 000 kwa kilo iongezeka angalau hadi kufikia Shs. 1, 200 kwa kilo kutokana na kupanda kwa gharama za kilimo kuanzia kwenye mbegu na viuadudu.

Akijibu hoja kuhusu bei, Mkaguzi wa Pamba Wilaya ya Kwimba kutoka Bodi ya Pamba nchini (TCB), Penina Range, anasema upangaji wa bei ya kununulia pamba hutegemea mambo kadhaa, bei ya soko la dunia na nguvu ya shilingi ikiwemo.

Kwa wastani, gharama ya kuzalisha kilo moja ya pamba ni kati ya Shs. 500 hadi Shs. 600, sawa na Shs. 300, 000 kwa ekari moja kulingana na upatikanaji wa pembejeo, usimamizi na uzingatiaji wa kanuni na mahitaji ya kitaalam pamoja na umbali anakotoka mkulima.

 

Kusimamia malengo, na kubadilishana uzoefu

Miongoni mwa changamoto zinazokwamisha maendeleo ya sekta ya kilimo cha pamba ni kukosekana kwa usimamizi wa malengo kwa serikali na wadau kubadilisha taratibu hata katikati ya msimu.

“Msimu huu tumeanza kuona mafanikio baada ya serikali na wadau wa pamba kusimamia malengo ya kutumia dirisha moja kuanzia kwenye upatikanaji na usambazaji wa mbegu pamoja na ununuzi,” anasema Ofisa Ugani wa Kata ya Malya, Hamisi H. Mzee.

Kupitia mfumo wa dirisha moja, kazi ya kupokea, kugawa mbegu na ununuzi wa pamba hufanywa na Kikosi Kazi cha Kijiji husika (Village Task Force, VTF), inayoongozwa na mkulima maarufu kama Mwenyekiti, Mtendaji wa Kijiji, wagani kazi, maofisa ugani na wakulima ambao ni wajumbe.

Kikosi Kazi pia kimeundwa katika ngazi ya kata na wilaya kikiwa na jukumu la kuhamasisha, kusimamia, kuelekeza na kutekeleza malengo ya kilimo chenye tija cha zao la pamba.

Kutokana na kutofautiana kwa mazingira na changamoto za kazi, Mzee anashauri pawepo utaratibu wa Maofisa Ugani, wataalam wa kilimo, wakulima pamoja na wadau wengine wa zao la pamba kukutana mara kwa mara kubadilishana uzoefu na kuzitafutia ufumbuzi wa pamoja changamoto zinazokwamisha maendeleo ya sekta hiyo.

Makala haya yataendelea……..

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com