Connect with us

Jamii

Moshi Vijijini: Wananchi wagomea mradi wa maji. Harufu ya ufisadi yanukia

Published

on

DHANA kwamba Watanzania wengi ni watu wanaoumia “kimoyomoyo” hata kama wanaumizwa, imeanza kutoweka.

Idadi yao kubwa; wale walioko vijijini na mijini, wasomi na wale walioshindwa “kukanyaga” madarasa, wameanza “kufunguka.” Hawadanganyiki tena kirahisi.

Hali hii inadhihirishwa na msimamo wa wanakijiji wa Kata ya Mbokomu, Wilaya ya Moshi Vijijini, Kilimanjaro, ambapo pamoja na kukabiliwa na shida kubwa ya majisafi na salama, wamekataa mradi wa maji unaodaiwa kujengwa chini ya kiwango.

Tangi la mji la mradi wa Korini.

Wananchi hao wanapiga hatua kadhaa mbele, wakifunguka kuwa mradi huo umejaa harufu ya ufisadi.

Mradi huo ulifadhiliwa na Benki ya Maendeleo Afrika (ADB) na kugharimu Sh. bilioni 1.3 ikiwa ni mkopo wenye masharti nafuu na ulianza kujengwa mwaka 2013  na kukamilika mwaka 2014.

Kutokana na “mgomo” huo wa wananchi, hadi sasa haujakabidhiwa rasmi kwao kutokana na madai yanayohusiswa na ufisadi.

FikraPevu iliyotembelea eneo hilo la mradi, imebaini kuwepo kwa madai kuwa, licha ya mradi huo kujengwa chini ya kiwango, mkandarasi alilipwa fedha zake zote.

Wananchi wanahoji, “uadiifu wa viongozi waliosimamia mradi huo uko wapi? Au nao ni mingoni mwa wanufaika wa njia ovu?”

Kinacholalamikiwa na wananchi ni fedha iliyotumika katika mradi haiendani na thamani ya mradi, ramani ya mradi inaonesha chanzo ambacho kingetumika kuchukua maji kipo ndani ya msitu, lakini kilichotumika ni chanzo kilichopo mtoni.

Kama mradi huo ungekamilika kwa kiwango stahiki, zaidi ya kaya 3,000 katika vijiji vya Korini Juu, Korini Kati na Korini Kusini wangenufaika kwa kupata huduma ya majisafi na salama.

FikraPevu imeshuhudia usumbufu, hasa unaowahusu wanawake – wa kutembea umbali mrefu wa kati ya saa moja na moja na nusu kusaka maji .

Mwenyekiti wa Kitongoji cha Rau KDC, kilichopo Kijiji cha Korini Kusini, Joseph Lema amesema licha ya mradi huo kutokabidhiwa rasmi, wapo baadhi ya watu wanachota maji hayo yanayotoka kwenye baadhi ya mabomba.

Kituo cha maji.

FikraPevu ilishuhudia machafu yakitiririka kwenye moja ya mabomba yaliyounganishwa kwenye mradi huo.

“Tangu mwaka 2014 wananchi hawajakabidhiwa mradi huu licha ya wananchi kutumia muda wao mwingi kuchimba mitaro kwa ajili ya kutandaza mabomba na wale ambao hawakushiriki walitozwa faini na ya 5,000 kila mmoja,” anasema.

Mwenyekiti wa Kitongoji cha Mpirani, Joseph Kimath, ameiambia FikraPevu kuwa hawapo tayari kuupokea mradi huo hadi hapo kasoro zilizopo kwenye mradi huo zitakapofanyiwa kazi .

FikraPevu imeona kuwepo kwa vituo (virura) zaidi ya 50 vya kuchotea maji ambavyo mpaka sasa havitoi maji, huku vingine vikiwa havina hata mabomba wala pampu za kusukuma maji .
Wananchi wacharuka

Livingstone Nderaio Macha, mkazi wa Kitongoji cha Rau KDC ni mmoja wa wananchi wa Kijiji cha Korini Kusini ambaye alitoa ardhi yake kwa ajili ya kuruhusu kujengwa kwa kituo cha kuchotea maji .
Katika mazungumzo na FikraPevu, anasema  tangu kujengwa kwa kituo hicho hakuna mabomba yaliyoingizwa ndani wala pumpu za kusukama maji, huku akiitaka Ofisi ya Mhandisi wa Maji Wilaya ya Moshi Vijijini kukiondoa kituo hicho kwa madai kuwa hakina msaada wowote kwake.
“Tangu mwaka 2014 walipojenga hiki kutuo, sijawahi kuwaona, ukiangalia huku ndani hakuna bomba wala pampu ya kusukuma maji, huu ni ubabaishaji mkubwa, kumbuka wananchi walishurutishwa kuchimba mitaro kutoka huko juu hadi chini, lakini hakuna maji,” anasema.
Macha anaiambia FikraPevu kuwa wananchi wengi walijikuta wakichukuliwa mali zao na hata kushambuliwa kutokana na kushindwa kushiriki katika shughuli za kuchimba mitaro, huku wengine walitozwa  faini ya Sh. 5,000 ikiwa ni adhabu kwa kutoshiriki kazi za kujitolea.
Mkazi mwingine wa kitongoji hicho, Jackson Omar Moshi ambaye pia ndani ya ardhi yake pamejengwa kituo cha maji, anasema tangu kujengwa kwa kituo hicho hakuna kiongozi yoyote aliyefika katika eneo hilo kuelezea juu ya kukwama kwa mradi huo.
Kama ilivyokuwa kwa Macha, FikraPevu ilishuhudia ilishuhudia kituo hicho kilichopewa namba 0304302516WP39 (Water Pipe) kikiwa hakina mabomba wala pampu za kusukuma maji, huku wananchi hao wakidai hawajui hatima ya mradi huo ni lini utaanza kutoa maji.
Mwenyekiti wa Bodi ya Maji aibuka

Mwenyekiti wa bodi ya maji ya mradi huo- uliopewa jina la ‘mradi wa maji Korini’, Willbart Kisanga amesema tangu hatua za awali za ujenzi wa mradi huo, wananchi hawajawahi kushirikishwa.
Ameiambia FikraPevu kuwa bodi haijawahi kuoneshwa hata ramani ya ujenzi wa mradi huo na licha ya kuulalamikia katika ngazi mbalimbali ikiwamo ofisi ya mkuu wa mkoa, ofisi ya mkuu wa wilaya na ofisi ya mkurugenzi wa halmashauri ya wilaya ya Moshi Vijijini. Huko “hakuna hatua zilizochukuliwa.”
Mwenyekiti huyo wa bodi anasema mwaka 2014 mradi huo ulikuwa miongoni mwa miradi iliyozinduliwa na kiongozi wa mbio za Mwenge wa Uhuru kitaifa, lakini siku mbili baada ya uzinduzi huo, kibao cha uzinduzi kiliondolewa “chapchap” na kufichwa kusikojulikana.
Utata mwingine unaodaiwa kugubika mradi huo ni pamoja na kutumika matanki ya zamani badala ya kujengwa matanki mapya, huku baadhi ya matanki yakiwa machakavu.
FikraPevu imebaini kuwa matanki ya zamani yaliyopigwa rangi kuonesha kuwa ni mapya, yapo katika maeneo ya Sahoni Gulio, Masanga – Kwa Msendo na Machadi Juu.

Mwenyekiti huyo akatoa masimamo wa bodi kwamba hawataupokea mradi huo hadi hapo mapungufu yaliyobainika kwenye mradi huo yatakapopatiwa ufumbuzi, ikiwamo kuwekwa kwa mabomba na pampu za kusuka maji kwenye virura vilivyojengwa kulingana na ramani ya mradi huo.
Hofu ya magonjwa ya mlipuko

Mwenyekiti huyo wa bodi ya maji anasema maji yanayotoka katika mabomba ya mradi huo ni machafu na yanatishia mlipuko wa magonjwa ya kuhala kutoka na kutowekwa dawa, huku chanzo cha maji kinachotumika kusambaza maji hayo kikiwa hakina uzio.
FikraPevu imeona maji hayo yanatoka kwenye mfereji wa maji wa Mrambo na kuelekezwa kwenye mabomba yanayokwenda kwa wananchi kwa ajili ya matumizi ya nyumbani ikiwamo kunywa.

Mhandisi atetea

Mhandisi wa Maji Wilaya ya Moshi Vijijini, Elifadhili Mrutu, ametetea mradi huo akidai hauna kasoro yoyote huku pia akitupilia mbali madai ya wananchi kuwa maji ya mradi huo ni machafu na kuongeza kuwa ni hivi karibuni tu maji hayo yamewekewa dawa.
 

FikraPevu ilichoshuhudia

Pamoja na kuwepo malalamiko na kauli ya “wakubwa” wa maji wa halmashauri hiyo, ni dhahiri kuwa maji hayo ni mchafu.

Kwa macho tu ya kawaida, uchafu unaonekana na yakikaa ndani ya chombo kwa muda wa siku mbili au zaidi, hutoa harufu na utando wa njano, hivyo hayafai kwa matumizi ya binadamu.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com