Connect with us

Siasa

Sababu za Nyalandu kuondoka CCM zatajwa

Published

on

Mchakato wa kupatikana kwa Katiba Mpya umetajwa kuwa sababu iliyomsukuma Mbunge wa Singida Kaskizini, Lazaro Nyalandu kujivua wadhifa wa ubunge na kuondoka CCM, Fikra Pevu imeelezwa.

Nyalandu ambaye alishiriki katika mchakato huo, lakini hivi karibuni ameonekana kutofautiana na msimamo wa chama chake akitaka katiba ya Warioba ndio ipitishwe huku akiwataka wabunge wenzake kukataa hoja ya kuondoa ukomo wa urais ambayo imekuwa ikitolewa na baadhi ya wananchi.

“Nawashukuru wabunge wenzangu CCM na upinzani wanaounga mkono hoja ya kurejea upya Rasimu ya Katiba Mpya kama ilivyopendekezwa na Tume ya Warioba”, aliandika Nyarandu Oktaba 23 mwaka huu katika ukurasa wake wa Twitter na kuongeza kuwa,

“Wabunge tusikubali hoja zinazolenga kukiuka ukomo wa muda wa uongozi uliowekwa kikatiba wa miaka mitano. Tujikite kupata Katiba Mpya Tanzania”.

Katika kuendeleza hoja yake ya Katiba Mpya, Nyalandu alikaririwa kuanza mchakato wa kufikisha hoja binafsi kwa Spika wa Bunge, Job Ndugai ya kurejea mchakato wa Katiba Mpya aliyowasilishwa na Tume ya Jaji Warioba.

Katiba ya Warioba ilizingatia mapendekezo mengi ya wananchi lakini kutokana na kutishia maslai ya wanasiasa wakiwemo wale wa chama tawala ilipingwa vikali na ikabadilishwa na kuwa na Katiba Pendekezwa au Katiba ya ‘Chenge’.

Kabla hajatimiza hazma ya kufikisha hoja binafsi bungeni, Nyalandu ameamua kujivua nafasi yake ya ubunge na uongozi ndani ya CCM huku akiwa na dhamira ya kuhamia Chama Cha Demokrasia na Maendeleo (CHADEMA).

Licha ya  Mbunge huyo kutaja sababu za kujiuzulu nafasi  ya Ubunge na kuhama kutoka katika Chama Cha Mapinduzi (CCM) kuwa ni ongezeko la ukiukwaji wa haki za binadamu na vitendo vya udhalimu wanavyofanyiwa baadhi ya watanzania, wachambuzi wa masuala ya kisiasa wanaeleza kuwa tofauti za kisiasa ambazo zinaendelea katika chama chake zinaweza kuwa zimechangia uamuzi huo.

Nyalandu amechukua uamuzi wa kujiuzulu leo katika taarifa aliyoitoa kwa vyombo vya habari siku chache baada ya kumaliza ziara ya kutembelea wananchi katika jimbo lake la Singida Kaskazini.

Amesema amechukua uamuzi huo akiwa na hazma ya kutimiza haki yake ya kikatiba na ameamua kukihama Chama Cha Mapinduzi na kujivua nafasi ya Ubunge.

“Nimeamua kujiuzulu nafasi yangu ya Ujumbe wa Halmashauri Kuu ya Chama Cha Mapinduzi (CCM), pamoja na nafasi zote za Uongozi ndani ya Chama kuanzia leo, Oktoba 30, 2017”.


“Asubuhi ya leo nimemwandikia Spika wa Bunge, Mh. Job Ndugai, barua ya kujiuzulu nafasi yangu ya Ubunge wa Jimbo la Singida Kaskazini kupitia tiketi ya CCM, nafasi ambayo nimeitumikia kwa vipindi vinne mfululizo tangu nilipochaguliwa kwa mara ya kwanza mnamo mwaka 2000 hadi Sasa”. – Lazaro Nyalandu.


Fikra Pevu imeelezwa kuwa dalili za Nyalandu kutofautiana na misimamo ya chama chake (CCM) zilianza kujitokeza hivi karibuni katika tukio la kushambuliwa na kupigwa risasi kwa Mbunge wa Singida Mashariki, Tundu Lissu mapema Septemba mwaka huu, ambapo alishambuliwa na watu wasiojulikana akiwa nyumbani kwake mjini Dodoma.

Lissu alitibiwa katika hospitali ya Mkoa Dodoma na baadaye alihamishiwa katika Hospitali ya Nairobi iliyopo nchini Kenya ambako anaendelea na matibabu mpaka leo.

Akiwakilisha wabunge wa mkoa wa Singida, Septemba 16 mwaka huu Nyalandu alifunga safari mpaka Nairobi kumjulia hali Tundu Lissu huku akiwataka watanzania kuweka pembeni tofauti zao kisiasa na kidini na waungane kwa pamoja kupinga dhuluma dhidi ya watanzania ambao wanashambuliwa na watu wasiojulikana.

"Nimefika hospitali ya Nairobi mapema leo kumjulia hali Mhe. Tundu Lissu. Naamini kwamba hatua zaidi na haraka zitahitajika kumsadia apate huduma za kitabibu katika ubora na ufanisi uliopo kwa sasa duniani. Ni maombi yangu kwetu sote, tuweke pembeni tofauti zetu za kiitikadi, ama mitazamo, tuungane na kushikamana kama Taifa kwa ajili ya kumwomba Mungu anyooshe mkono wake, na kumponya”, alinukuliwa Nyalandu na vyombo vya habari akiwa Nairobi.

 “Aidha, shambulio hilo walilolifanya watu wasiojulikana limedhalilisha taifa, na kudhoofisha taswira ya kukomaa kwa demokrasia inayoruhusu kuvumiliana na kuheshimiana licha ya tofauti zetu za kiitikadi na mitazamo ya kisiasa”, Alinukuliwa Nyalandu akiongelea hali ya Lissu.

Kutokana na hali ya Lissu kuimarika, mikakati mbalimbali ya kumtoa Nairobi kumpeleka katika nchi nyingine kwa ajili ya matibabu zaidi ziliendelea. Hata katika hatua hiyo, Nyalandu alijitokeza tena kutaka kufanya mipango ya kumsafirisha Lissu hadi Marekani kupata matibabu. Lakini mkakati huo ulikwama kwasababu madaktari walishauri kuwa hali ya mgonjwa hairuhusu kusafirishwa.

Nyalandu ambaye kwa ushirikiano wa Shirika la Samaritan’s Purse, mwezi  Mei mwaka huu alifanikisha safari ya wanafunzi 3 majeruhi wa ajali ya basi la Shule ya Msingi Lucky Vincent iliyoua watu 35 kuelekea Marekani kwa ajili ya matibabu ambapo walilazwa katika hospitali ya Mercy iliyopo Jiji la Sioux, Iowa. Kwa kutumia ushawishi wa shirika hilo, Nyalandu na familia ya Lissu walianza mikakati ya kumsafirisha Lissu nje ya Kenya kabla ya kupata pingamizi la madaktari wa Nairobi.

Mbunge wa Singida Kaskazini, Lazaro Nyalandu (katikati) akiteta jambo na Mbunge wa Iringa Mjini, Peter Msigwa (Kushoto) na Godbless Lema, Arusha Mjini (Kulia), Ezekiel Wenje, mwanachama wa CHADEMA na Mbunge wa Arumeru Mashariki, Joshua Nasari (akiwa nyuma ya Nyalandu), hivi karibuni jijini Nairobi, Kenya.

Hata aliporudi nchini akitokea Kenya, Nyalandu  aliendelea kutoa matamko ambayo yalikuwa yanapinga vitendo vya kuminya demokrasia na kuvamiwa kwa baadhi ya watanzania ambavyo vimekuwa vikitokea katika maeneo mbalimbali nchini.

Fikra Pevu imeelezwa kwamba kuna tofauti ya mitazamo ndani ya CCM kuhusu kushirikiana na wapinzani katika masuala mbalimbali ya kitaifa, ambapo wengine wanaliona suala hilo kama ni uzalendo lakini baadhi ya viongozi wanaliona kama ni usaliti kwa chama.

Hali hiyo imesababisha baadhi ya wanachama kuogopa kushirikiana na wanachama wa vyama vingine kwa kuhofia kuchukuliwa hatua ndani ya chama.

Mwaka 2016, alisikika kiongozi mmoja wa ngazi ya juu CCM akisema watu ambao wanaenda kuwaona wabunge wa upinzania ambao wamepata matatizo ya kuumwa au kufungwa jela wanakisaliti chama.

Hatua hiyo ilimlazimu Mwenyekiti wa Kamati ya Bunge ya Viwanda, Biashara na Mazingira, ambaye pia ni Mbunge wa Igunga, Dkt. Peter Kafumu na Makamu wa Kamati hiyo, Vicky Kamata (Mbunge Viti Maalumu-CCM) kujiuzulu nafasi zao katika kamati hiyo Ili kuonyesha hisia za kutoridhishwa na msimamo huo wa baadhi ya viongozi wa CCM. 

Sababu ya kujiuzulu kwao zinatajwa kuwa walikuwa na mipango ya kwenda kumuona Mbunge wa Arusha Mjini, Godbless Lema (CHADEMA) ambaye alikuwa anashikiliwa katika gereza la Kisongo mkoani Arusha kwa tuhuma za uchochezi.

Kwa upande wake, Mbunge wa Kigoma Mjini, Zitto Kabwe ameandika katika ukurasa wake wa Facebook akimpongeza Nyalandu kwa uamuzi aliyoufanya, ambapo amesema,

“Lazaro Nyalandu, umeonyesha Uongozi. Kwa namna haki za watu zinavyovunjwa na Uchumi wa Nchi unavyoporomoka. Umefanya maamuzi sahihi, wakati sahihi na kwasababu sahihi. Kila la kheri”.

Wachambuzi wa masuala ya kisiasa wanaeleza kuwa kitendo cha Nyalandu kujiuzulu kinaweza kuwa ni shinikizo ndani ya chama chake kutokana na mwenendo ambao amekuwa akiuonyesha hivi karibuni ambao unatajwa kutofautiana na misamamo ya baadhi ya viongozi wa chama tawala.

 

 

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com