Connect with us

Jamii

Shahidi katika kesi 457 asema hakuona uhusiano wa JamiiForums na Jamii Media

Published

on

Shahidi  wa upande wa Jamhuri katika kesi 457 inayoikabili JamiiForums,  amekiri kutokuwepo kwa mahusiano kwa  kampuni ya Jamii Media na JamiiForum kwa kuwa kisheria kila kampuni inasimama peke yake.

Kesi hiyo ambayo ilianza kusikilizwa mwaka jana msingi wake ni polisi kuitaka JamiiForums iwapatie taarifa za mwanzisha mada na mchangiaji mmoja ili waweze kuwakamata na kuwahoji juu ya kashfa ya kuchafuliwa kwa kampuni ya CUSNA Investment na Oceanic Link ambayo ilidaiwa kufoji nyaraka bandarini, kukwepa kodi na kuwatesa wafanyakazi wazalendo na kupendelea wageni toka nje ya nchi.    

 JamiiForums inadaiwa kuwa ilikataa kutoa taarifa binafsi za mwanachama wake kwa kuamini kuwa chanzo hiki cha taarifa kilikuwa na nia njema hivyo kutaka kwanza iwepo Hati ya Mahakama inayoridhia kukamatwa kwa mhusika na kuelezwa kosa lake.

Akitoa ushahidi wake leo katika Mahakama ya Hakimu Mkazi Kisutu, shahidi huyo ambaye ni Msajili Msaidizi Mkuu kampuni kutoka Wakala wa Usajili wa Kampuni (BRELA), Rehema Kitambi amesema  mnamo 13 Desemba, 2016 alipokea barua kutoka kwa Mkuu wa Upepelezi wa Makosa ya Jinai ikimtaka athibitishe usajili wa JamiiForums na wakurugenzi wake.

 Anasema katika uchunguzi wao waligundua kuwepo kwa kampuni nyingine ya Jamii Media ambayo inaongozwa na Mkurugenzi Mtendaji Maxence Melo lakini kampuni hiyo haina uhusiano na JamiiForums kutokana na taratibu za kisheria kila kampuni inasimama peke yake.

Majibu ya shahidi huyo yanatokana na swali aliloulizwa na Wakili wa Utetezi, Jeremia Mtobesya ambaye alitaka kujua uhusiano wa kampuni hizo mbili ikizingatiwa kuwa shahidi aliitaja Jamii Media ikizingatiwa  kuwa kwenye kesi ya msingi natajwa JamiiForums.   

Shahidi huyo anakuwa ni shahidi wa tatu kwa upande wa Jamhuri kutoa ushahidi katika kesi 457 inayosimamiwa na Hakimu Godfrey Mwambapa ambapo upande wa utetezi unawakilishwa na  Mawakili Jebra Kambole na Jeremia Mtobesya  na upande wa Jamhuri ukiongozwa na Wakili Mutalemwa Kisenyi.

Wakurugenzi wa Jamii Media, Maxence Melo (kulia) na Mike Mushi wakitoka katika Mahakama ya Mkazi Kisutu mara ya kumalizika kwa kesi 457 mapema leo jijini Dar es Salaam

Kesi hiyo imeendelea tena leo kwa shahidi huyo kutoa ushahidi wake na hali ilikuwa hivi:

 Hakimu Mwambapa: Kwa kumbukumbu, Shahidi wa leo ni shahidi wa tatu 

Shahidi: Naitwa Rehema Kitambi, dini yangu ni Mkristo. Cheo changu ni Msajili Msaidizi Mkuu wa Makampuni kwa muda wa kama miezi sita iliyopita sasa.

Wakili wa Jamhuri: Waajiri wako ni nani?

Shahidi: Ni BRELA

Wakili wa Jamhuri: Kituo chako cha kazi ni wapi?

Shahidi: Dar es Salaam

Wakili wa Jamhuri: Majukumu yako kama Msajili Msaidizi Mkuu wa makampuni ni yapi?

Shahidi: Majukumu ni kuhakiki nyaraka mbalimbali kwa ajili ya kufanya usajili kwa ajili ya makampuni mapya na na nyaraka baada ya usajili kwa ajili ya mabadiliko mbalimbali kwenye makampuni. Na kufanya usajili husika na majina ya biashara husika

Wakili wa Jamhuri: Nini pia unafanya tofauti na hilo?

Shahidi: Kuhakiki taarifa mbalimbali ikiwa ni kufanya mabadiliko mbalimbali katika kampuni na majina ya biashara. Pia kutoa ushauri wa kisheria, kujibu barua mbalimbali kutoka kwa mtu yeyote anayetaka kupata taarifa ikiwa ni Kampuni binafsi au taasisi za Serikali

Wakili wa Jamhuri: Nini kilitokea mnamo tarehe 13/12/2016?

Shahidi: Nilipatiwa barua nijibu taarifa ikitaka taarifa juu ya Maxmelo na kampuni ya Jamii Forum, na nilipewa barua nieleze.

Wakili wa Jamhuri: Barua ilitoka wapi?

Shahidi: Ilikuwa inatoka kwa Mkuu wa upelelezi wa makosa ya jinai

Wakili wa Jamhuri: Barua ilikuwa inataka nini?

Shahidi: Ilikuwa inataka taarifa za usajili za kampuni ya Jamii Forum na kujua jina Maxmelo kama ni mmoja wa Wakurugenzi wa hiyo kampuni.

Wakili wa Jamhuri: Halafu ukafanya nini?

Shahidi: Kwa mujibu wa taratibu unaitisha jalada, kwa uchunguzi niliitisha jalada toka Masjala kulikuwa hakuna kampuni iliyosajiliwa kama Jamii Forum kwa siku hiyo tarehe 13/12/2016.

Tulitafuta kwenye system iitwayo Saperion, ambayo ina scan taarifa za usajili kwa kipindi fulani. Tuliingiza jina la Maxmelo akatokea kwenye kampuni tatu kwa tarehe hiyo, ambazo sizikumbuki lakini moja ilikuwa ni Jamii Media. Masijala wanafanya hii search then wanakuletea majalada hayo

Wakili wa Jamhuri: Halafu ulifanya nini?

Shahidi: Nikajibu barua ya Mkurugenzi wa upelelezi juua ya majina ya wasajiliwa, namba za usajili, tarehe za usajili na wamiliki wa hisa za hizo kampuni tatu alizotokea Maxmelo (akimaanisha Maxence Melo)

Wakili wa Jamhuri: Ukiona barua nini kitakutambulisha kama ni yenyewe?

Shahidi: Nembo ya BRELA na sahihi yangu mwenyewe

Baada ya Wakili wa Jamhuri kumaliza mahojiano na shahidi, anapewa nafasi Wakili wa utetezi Jeremia Mtobesya kumuuliza maswali shahidi.

 
Mtobesya
: Kwenye hii barua kuna sehemu yeyote umeeonyesha uhusiano kati ya Jamii Media na JamiiForums?

Shahidi: Kwenye barua nimesema hatukuona 

Mtobesya: Kwa maana hiyo nitakuwa sahihi nikisema havina uhusiano (Jamii Media na JamiiForums) wowote?

Shahidi: Kisheria kila kampuni inasimama pekee. Lakini barua ilitaka kujua kama Jamii Forum inatokea sehemu ndio maana tukajibu hivi

Mtobesya: Kwenye lile angalizo la kwenye barua yako ni nini hasa kimeelezewa?

Shahidi: Mbali na nyaraka zile za usajili za awali kampuni imewasilisha baadhi ya form kutaka kufanya mabadiliko katika yale tuliyofanya awali kwenye usajili; Mabadiliko ya Wakurugenzi na wamiliki, ila kwenye barua nimeandika na kadhalika.

Mtobesya: Wakati wewe unaandika barua hii mlikuwa mmesha-attend mabadiliko hayo?

Shahidi: Ndio ila hatukufanya changes kwa sababu ya kasoro kadhaa. Maombi yalikuwa yamepokelewa ila yanashughulikiwa kujibu barua hiyo ya mabadiliko.

Mawakili wote wanasema hawana maswali ya ziada kwa shahidi, anaruhusiwa kuondoka. Kesi itaendelea kesho, Jamhuri imesema inao mashahidi wawili wa kufunga ushahidi katika kesi hii hapo kesho.

Mwenendo wa kesi

Ikumbukwe kuwa shahidi wa kwanza upande wa Jamhuri alisema katika ushahidi wake Agosti 24 mwaka huu ambapo alidai kuwa Polisi hawana utaalamu wa kulazimisha kuingilia mawasiliano kimtandao.  Desemba 5 mwaka huu shahidi wa pili ambaye ni Mkuu wa Upepelezi wa Makosa yaJinai alitoa ushahidi wake na kukiri kuwa aliindikia barua JamiiForums kutaka impatie taarifa muhimu za wateja wake wawili lakini hawakutoa ushirikiano.

ikumbukwe kuwa mwishoni mwaka 2016, Maxence Melo alikamatwa na  kushikiliwa na Jeshi la Polisi katika kituo kuu cha polisi, Dar es Salaam, kwa madai ya kugomea agizo la muda mrefu la jeshi hilo kupewa taarifa za watumiaji JamiiForums bila mafanikio. siku chache zilizofuata alifikishwa mahakamani  kuachiwa kwa dhamana. 

Tangu wakati huo kesi inaendelea kusikilizwa na inatarajiwa kutolewa uamuzi mwishoni kabla ya mwaka huu kuisha.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com