Connect with us

Siasa

Sheria ya Makosa ya Mitandao ni mtego wa panya, hakuna aliye salama!

Published

on

UJIO wa Sheria ya Makosa ya Mtandao (The Cyber Crimes Act, 2015) ambayo ilipitishwa na Bunge la Jamhuri ya Muungano karibu saa 6 usiku Jumatano, Aprili Mosi, 2015, hauna tofauti na mtego wa panya.

Sheria hiyo, ambayo tayari imekwishaanza kutekelezwa kwa ‘nguvu zote’, ilipitishwa maalum ikiwalenga zaidi wanahabari na hasa watumiaji wa mitandao ya kijamii.

Lakini hata walioipitisha, ambao walitumia nguvu kubwa na hoja za nguvu badala ya nguvu za hoja, hawakujua kama inawahusu hata wao.

Nitawakumbusha kuhusu kisa maarufu cha Mtego wa Panya, ambao unaingia waliomo na wasiokuwamo. Panya, mnyama mdogo anayeishi porini na nyumbani, anafahamika kwamba ni mharibifu japokuwa ukweli ni kuwa, yeye huwa anatafuta riziki yake bila kujua kwamba anaharibu. Siku moja panya akaubaini mtego aliowekewa uvunguni mwa kitanda na mwenye nyumba ili umnase.

Kwa kujua madhara yake kwamba maisha yake yalikuwa hatarini, akamwendea jogoo wa mwenye nyumba akimuomba amsaidie kuutegua kwa sababu ulikuwa na madhara kwa wote. 

Lakini jogoo akajibu: "Ondoka zako, miye mtego wa panya unanihusu nini wakati sina kawaida ya kufika uvunguni mwa kitanda! Huo ni wako mwenyewe uliyezowea kuchokonoa na kuharibu vitu vya watu."

Panya akamwendea mbuzi wa mwenye nyumba, akasema: "Ewe mbuzi mwema, unajua kuna mtego wa panya uvunguni mwa kitanda cha mwenye nyumba. Tusaidiane mawazo ya kuutegua kabla haujatudhuru wote". 

Mbuzi akajibu: "Tangu lini ukaniona nikiingia chumbani kwa mwenye nyumba, sembuse huko uvunguni mwa kitanda? Mtego huo wa panya haunihusu miye mbuzi".

Panya hakuchoka, akamwendea ng'ombe wa mwenye nyumba, akisema: "Ewe ng'ombe wa bwana, kuna mtego wa panya umewekwa uvunguni mwa kitanda. Tusaidiane mawazo namna ya kuutegua kabla haujatuletea madhara".

Ngombe akacheka sana: "Sijapata kusikia jambo la ajabu kama hilo. Yaani, miye ng'ombe nidhurike na mtego wa panya ulio uvunguni mwa kitanda! Mimi na mtego wa panya wapi na wapi! Hilo halinihusu." 

Panya akakosa msaada, lakini akaendelea kuishi kwa mashaka na tahadhari. Ikatokea usiku mmoja nyoka akaingia chumbani kwa mwenye nyumba na katika kutambaa kwake uvunguni mwa kitanda, mkia wake ukanasa mtegoni. Kishindo kilisikika.

Mwenye nyumba, akiamini tayari panya mharibifu amenaswa, bila kujua kwamba ni nyoka aliyenaswa mkia na ana hasira dhidi ya mtu aliyeuweka, yeye akapeleka mkono chini ya vungu wa kitanda ili auchukue mtego huo wenye panya. Hamadi! Nyoka yule mwenye hasira na sumu kali akamng’ata, na jitihada za kuokoa maisha yake zikashindikana, akafa. Usiku huo majjirani wakafika msibani na kesho yake watu wachache wakafika ili kupanga taratibu za mazishi. Wakahitaji kitoweo, hivyo wakamkamata jogoo wa mwenye nyumba na kumchinja. Siku ya pili watu wakaongezeka na kitoweo pia kilihitajika, wakamchinja mbuzi wa mwenye nyumba. 

Siku ya maziko, kwa kuwa watu walikuwa wengi zaidi, akakamatwa ng'ombe wa mwenye nyumba na kuchinjwa! Ni jogoo, mbuzi na ng'ombe wa mwenye nyumba walioamini kuwa madhara ya mtego ule wa panya yasingewahusu wao. Walikosea. Panya alikuwa sahihi, na wala mtego haukumdhuru panya!

Muswada wa Sheria ya Makosa ya Mtandao haukuwahi kujadiliwa na ulipelekwa Bungeni kwa Hati ya Dharura. Vyombo vya habari viling’amua mapema na kuanza kuupigia kelele kwamba ni mtego ambao utawanasa wote, waliomo na wasiokuwamo.

Wanahabari na Asasi za kiraia walieleza ubaya wa sheria hiyo lakini wakabezwa, wakapuuzwa na kukejeliwa, huku baadhi ya wanasiasa, hasa wenye dhamana ya kutunga sheria, wakiona hiyo ndiyo ilikuwa fursa muhimu ya ‘kuwaminya wambeya’ ambao ‘wanafuatilia mambo yao’, wakaipigia vigelegele.

Wanasiasa wa upinzani pamoja na wanaharakati wa haki za binadamu waliungana na wanahabari kupiga kelele kuhusu ujio wa sheria hiyo, nao hawakusikilizwa. Hata ile maoni ya Kambi ya Upinzani kuhusu muswada huo yaliyosomwa na Msemaji wa Kambi Rasmi ya Upinzani Bungeni, Mohammed Habibu Mnyaa, Aprili Mosi, 2015, kamwe hayakusikilizwa.

Mvutano mkubwa ukatokea, wabunge wa upinzani wakasusia kikao na kutoka nje, wakabaki wale wa Chama cha Mapinduzi (CCM) ambao waliamua kukaa hadi usiku na kupitisha sheria hiyo. Wakaweka mtego wa panya kwa sababu wao ‘hauwahusu’. 

Nakumbuka Agosti 27, 2015 Taasisi ya Habari Kusini mwa Afrika tawi la Tanzania (MISA-TAN) iliwaita baadhi ya wahariri na waendesha blogu (bloggers) nchini kujadili ujio wa sheria kadhaa zinazowabana, si waandishi tu, bali Watanzania wote wanaotumia mitandao ya kijamii.

Sheria hizo ni hiyo ya Makosa ya Mtandao na Sheria ya Takwimu, ambazo zilianza kutumika Septemba Mosi, 2015 huku Mamlaka ya Mawasiliano Tanzania (TCRA) ikitangaza kiama kwa wale wanaotumia vibaya na wahalifu wote wa mitandao nchini.

Siyo siri, kwamba, kupitishwa kwa sheria hizo mbili kumeifanya Tanzania kuingia kwenye orodha ya mataifa yenye sheria kali za utumiaji wa mtandao na kuunyonga kabisa uhuru wa kupashana habari.

Maxence Melo, Mkurugenzi Mtendaji wa kampuni ya Jamii Media inayoendesha jukwaa maarufu duniani la JamiiForums pamoja na tovuti ya FikraPevu, ambaye alikuwa mmoja wa wawezeshaji kwenye warsha hiyo, alisema hicho kilikuwa kiama kwa Watanzania wote na hakuna ambaye atabaki salama.

“Lengo la Sheria ya Makosa ya Mitandao ni kuangalia makosa kama vile kutuma taarifa bila ridhaa ya mtu, kusambaza picha za ngono na za utupu, udanganyifu unaohusiana na kompyuta, kughushi kunakohusiana na masuala ya kompyuta na pia kusambaza picha za utupu za watoto na hata marehemu,” alisema.

Maxence ambaye ni mhandisi wa ujenzi kitaaluma, lakini mpigania uhuru wa kupashana habari hususan katika upande wa uandishi wa mitandaoni, alisema ingawa Watanzania walio wengi hawafahamu Sheria hiyo inawahusu kwa namna gani, lakini kwa lugha rahisi ni kuwa itamuathiri mtu yeyote anayetumia mtandao wa intaneti kwa kutumia kifaa chochote – iwe kompyuta kubwa au vifaa vyenye uwezo wa kufanya kazi kama kompyuta kama simu za mikononi, saa, televisheni na vifaa vingine vinavyoendana na hivyo.

Malengo ya Sheria hii ni kuainisha makosa yanayohusiana na matumizi ya mfumo wa kompyuta na Teknolojia ya Habari na Mawasiliano (TEHAMA), kuweka utaratibu wa upelelezi, ukusanyaji na matumizi ya ushahidi wa kielektroniki na masuala mengine yanayohusiana na hayo.

Matumizi ya mitandao yote mikubwa kama Twitter, Instagram, JamiiForums, Facebook, Barua pepe, WhatsApp, blogu na data zote zilizo katika kifaa chochote cha kielektroniki yanaathiriwa kwa kiwango kikubwa na Sheria hii. Hiyo inamaanisha kwamba, jitihada za kuufanya mtandao wa intaneti kuwa wazi ili kila mtu awe na uhuru wa kuunganishwa, kuwasiliana, kuandika, kusoma, kutazama, kuzungumza, kusikiliza, kujifunza, kuunda na kubuni nazo zinafikia kikomo.

Mbaya zaidi ni kwamba, sheria hiyo haijaeleza kuhusu kulinda uhuru wa kugundua na kuunda bila kulazimika kuomba idhini, hatua ambayo itawafanya wanasayansi chipukizi kuogopa kufanya ugunduzi wowote kwa kuhofia kuingia matatani. TCRA inasema Tanzania inaongoza kwa kuwa na watumiaji vibaya wengi wa mitandao ya kijamii, jambo linalosababisha taarifa nyingi za mitandao kutoaminika hadi nje ya nchi kutokana na kujaa uzushi, uongo, uchochezi na lugha na picha za matusi.

Kimsingi hakuna anayepingana kuwepo kwa sheria ya mitandao ambayo itadhibiti baadhi ya mambo, lakini tatizo kubwa lipo kwenye adhabu zinazoendana na sheria hiyo. 

“Sheria ni muhimu iwepo matumizi mabovu ya mtandao, hata hivyo adhabu zake ni kubwa kiasi kwamba hakuna Mtanzania wa kawaida, ambaye ndiye mtumiaji mkubwa wa mitandao hii, atakayemudu kulipa faini tajwa, vinginevyo mamia kwa maelfu wataishi gerezani,” alisema Maxence.

Akaongeza: “Sheria inapoeleza kwamba utalipa faini isiyopungua shilingi milioni tatu, au kifungo kisichopungua miezi sita, tafsiri yake halisi ya kisheria ni kwamba unaweza ama kuhukumiwa kulipa faini ya shilingi milioni hamsini au ukatumikia kifungo cha miaka 10 jela kwa sababu imeelezwa ‘isiyopungua’ na siyo ‘isiyozidi’.”

Kwa mujibu wa sheria hiyo, mtu atakayepatikana na hatia ya kusambaza picha za ngono, matusi, uasherati atalipa faini isiyopungua Shs. 30 milioni au kutumikia kifungo kisichopungua miaka 10 au vyote. James Marenga, Mwanasheria kutoka taasisi ya kisheria ya Nola, akielezea Sheria ya Takwimu, alisema nayo itawapeleka wengi gerezani.

“Kwa mujibu wa sheria hii, hakuna takwimu ambazo zitatolewa bila idhini ya mamlaka husika, na endapo mtu atatenda kosa hilo ataingia matatani,” alisema Marenga, ambaye pia ni mwanahabari na wakili wa Mahakama Kuu.

Ni kutokana na udhaifu na ukandamizaji uliomo kwenye Sheria hiyo ya Makosa ya Mtandao ndiyo maana kampuni ya Jamii Media mapema mwaka huu 2016, ikaamua kufungua Mahakama Kuu Kesi ya Kikatiba kuipinga sheria hiyo ikitaka baadhi ya vifungu virekebishwe.

Wakati hukumu ya kesi hiyo ikiwa bado kutolewa, serikali kupitia Jeshi la Polisi ikaamua kumkamata Mkurugenzi Mtendaji wa Jamii Media, Maxence Melo, na kumfungulia mashtaka kwamba amekiuka sheria hiyo ambayo anaipinga mahakamani na mshtakiwa mmojawapo likiwa Jeshi la Polisi. 

Siwezi kuzungumzia kwa undani kwa sababu tayari kesi hizi ziko kwenye mahakama za kisheria, lakini kimsingi ni kwamba, sheria hii kandamizi haiwezi kumuacha yeyote. Kumkamata Maxence na kumweka mahabusu kwa saa 144 bila dhamana ni dalili tosha kwamba mamlaka hazina mzaha licha ya ukweli kuwa ulimwengu wa sasa ni sawa na kijiji hasa katika zama hizi mpya za habari.

Leo hii kuna Watanzania milioni 23 ambao wanatumia mitandao ya kijamii ikiwemo Facebook, JamiiForums, WhatsApp, Viber, Twitter, Instagram, Skype na kadhalika, ambao kwa sheria hii watalazimika kurudi kwenye zama za analojia kwa sababu hawako salama.

Nakumbuka wiki moja kabla Maxence hajakamatwa na polisi, aliwaeleza wanahabari na wamiliki wa blogu nchini wakati wa semina ya siku mbili: “Tujiandae kukamatwa na dola, kwa sababu Sheria ya Makosa ya Mtandao imewapa nguvu polisi, kuanzia mkuu wa kituo (mwenye cheo cha Mkaguzi Msaidizi wa Polisi) kukukamata na kukufungulia mashtaka kama anaona – kwa mtazamo wake – taarifa uliyoichapisha inahatarisha usalama wa nchi.”

Akabainisha pia kwamba, kwa sheria hiyo, polisi wanaweza kukukamata na kukulazimisha uwape taarifa za vyanzo vyako vya habari.

Kwa hakika, jambo ambalo ni dhahiri linakwenda kinyume na taaluma ya habari pamoja na haki za binadamu, hususan uhuru wa kujieleza, kama inavyotamkwa na Ibara ya 18 ya Katiba ya Jamhuri ya Muungano wa Tanzania ya mwaka 1977.

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com