Connect with us

Jamii

SIKU YA MAJI DUNIANI: Tusiruhusu madhila ya maji Cape Town yakaikumba Dar

Published

on

Mara nyingi mgeni anapoingia mahali, imezoeleka kupokewa kwa shangwe na maneno mazuri ya kumkaribisha, ili ajisikie yuko salama na eneo salama.

Maneno yanayosikika kutoka kwa wenyeji ni “karibu, pole kwa safari” na mengine yanayofanana na hayo.

Hata hivyo, hali ni tofauti sana kwa wageni wanaoingia Cape Town, Afrika Kusini kwa sasa. Hawa hawapokelewi kwa maneno mazuri tena. Wanakumbana na maneno ya kuwaonya kuhusu matumizi ya maji.

Kila mahali, kuanzia ndani ya ndege kuelekea Cape Town, baada ya salamu, yanafuata maneno na kauli za kuonya wageni kwamba wasitumie maji hovyo. Maji hayatoshi.

Mgeni anaposhuka ndani ya ndege na kwenda maeneo ya wageni kujisajili, anakumbana na mabango yaliyojaa maneno hayohayo. Kwamba anakaribishwa, lakini asitumie maji hovyo.

Pembezoni mwa barabara, mabango yaliyosambaa ni kuhusu onyo kutumia maji. Hotelini na kila nyumba ya wageni, mapokezi ni “Cape Town hakuna maji ya kutosha, tumia kwa uangalifu.”

Fikra Pevu imeshuhudia kuwepo kwa matangazo ya aina hiyo ndani ya vyumba vya wageni na sehemu za maliwato.

“Cape Town, pamoja na uzuri na ukarimu wake kwa wageni, lakini inakabiliwa na uhaba mkubwa wa maji, hivyo kuwa mwangalifu unapotumia maji; iwe kuoga, kupiga mswaki, kunawa na matumizi mengine muhimu ya maji,” yanasomeka baadhi ya matangazo hayo.

Meya wa Jiji la Cape Town, Patricia de Lille,  anasema kuwa kuanzia Aprili mwaka huu, wananchi watalazimika kupunguza matumizi ya maji kwa asilimia 40 na kuruhusu lita 50 tu kwa mtu mmoja kwa siku, wakati jiji hilo likikabiliana na hali mbaya zaidi ya ukame kuwahi kulikumba katika karne hii.

Ameonya kwamba endapo mvua hazitanyesha na jitihada za kupunguza matumizi ya maji hazitafanikiwa, basi usambazaji maji ya kawaida utafungwa.

Ikiwa hilo litatokea, basi wakazi wa Cape Town watalazimika kupanga foleni kwenye vituo vya mabomba ya maji ya umma kwa mgao ambapo kila mtu ataruhusiwa kupata lita 25 za maji kwa siku. 

Meya huyo amesema wamefikia hatua hiyo baada ya kuwaeleza wananchi kutumia maji kwa uangalifu, lakini hali bado mbaya na hakuna matokeo mazuri katika hifadhi ya maji.

Jiji hilo ambalo huvutia mamilioni ya watalii kila mwaka, limeimarisha udhibiti mkubwa wa majitaka ikiwa ni pamoja na kupiga marufuku umwagaji wa maji kwenye mabwawa ya manispaa na kuwapeleka mahakamani wamiliki wa nyumba wanaofuja maji.

Jiji la Cape Town lenye wakazi wanaoelezwa kukaribia milioni 4, linakabiliwa na tatizo kubwa la uhaba wa maji tangu mwaka jana. Na hali inaendelea kuwa mbaya.

                   Cape Town huenda likawa jiji la kwanza duniani kukosa maji kabisa ifikapo mwishoni mwa Aprili 2018

Tatizo la maji Cape Town limeonesha kwamba majanga ya asili hayabagui taifa, rangi ya watu, hali zao matajiri au maskini. Wazungu na “weusi” wanaonekana wakipaga foleni kuteka maji katika mabomba ya umma.

Tayari vituo vya mabomba ya umma 200 vimetengwa na serikali ya jiji hilo kwa ajili ya kuukabili uhaba mkubwa wa maji uliopo sasa.

Kadri siku zinavyosonga, dalili za kunyesha mvua hazionekani kuwa karibu na jiji limetangaza kuwa mgawo utaweza kufikia hadi lita 5 kwa siku.

Cape Town huenda likawa jiji la kwanza duniani kukosa maji kabisa ifikapo mwishoni mwa Aprili 2018. Inaelezwa na uongozi wa jiji kuwa tarehe 29 ya mwezi huo, mabomba yote hayatakuwa na maji na mitambo ya kusukuma maji itazimwa.

Wataalamu wanaonya kwamba kama hatua sahihi dhidi ya mabadiliko ya tabia nchi hazikuchukuliwa, basi miji mingi barani Afrika, itakumbwa na hali hiyo ya kukosa kabisa maji katika kipindi cha miaka mitatu hadi mitano ijayo.

Kutokana na hali hiyo, ni vyema sasa kila nchi ikajipanga kuhimiza matumizi bora ya maji na kulinda vyanzo vyake ili haya yanayotokea Cape Town sasa, yasitokee.

Pamoja na adha ya maji kuonekana kwa wenyeji, upungufu huo mkubwa wa maji Cape Twon, unaelezwa kuathiri kwa kiasi kikubwa sekta ya utalii. Jiji hilo linaloongoza kuwa na watalii wengi, hivyo kuchangia kwa kiasi kikubwa mapato.

Tayari hoteli za kitalii zimebandika matangazo yanayowataka wateja kutooga kwenye mabafu, wasioge maji ya bomba-rasharasha (shower) kwa muda mrefu, kubadilishiwa shuka lazima waombe, watumie maji kidogo kuswaki na kwamba maji ya mabwaya ya kuogelea (swimming pool), hayatabadishwa mara kwa mara.

Katika kuonesha ukali wa tatizo hilo la maji, wageni kutoka miji mingine wanaokwenda Cape Town kwa shughuli za michezo, mikutano na mambo mengine, wanatakiwa kubeba maji yao ya kunywa.

Inaripotiwa kwamba ukame unaolikumba jiji la Cape Town hivi sasa, haujawahi kutokea katika karne moja.

Sayansi ya tabia nchi inatabiri kwamba ikiwa tatizo la ukosefu wa maji katika eneo hilo utaendelea, basi hali hiyo itakuwa inajirudiarudia katika kila miaka 100 ijayo.

Uhaba wa maji ni tatizo la dunia. Kila mamlaka katika nchi mbalimbali, ikiwamo Tanzania, zinapaswa kuchukua hadhari na kuepusha jambo hilo lisitokee kwa kujenga mabwawa ya kuhifadhi maji, kukinga na kuhifadhi maji ya mvua, kulinda vyanzo vya maji ya juu na chini ya ardhi na kuwa na matumizi bora endelevu ya umwagiliaji wa mashamba.

Yapo mengi ya kujifunza kutoka Cape Town kwa Tanzania, kwani taarifa zinaonesha, nchi hiyo ya ukanda wa Afrika Mashariki imekuwa na matumizi mabaya ya maji na kuruhusu kupotea kwa kiasi kikubwa cha maji yanaposafirishwa kwa matumizi ya umma.

Mamlaka za maji za miji ya Tanzania zimekuwa zikiripoti kupotea kwa kiasi kikubwa cha maji yanapokuwa akisafirishwa. Kwa Dar es Salaam pekee, zaidi ya asilimia 37 ya maji yanayosafirishwa hupotea njiani kabla ya kuwafikia watumiaji. Hali hii ni hatari. Tusiruhusu itokee.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com