Connect with us

Jamii

Ujenzi wa Reli ya Kati kuondoa adha ya usafiri. Jiwe la msingi kuwekwa wiki hii

Published

on

UJENZI wa kipande cha kwanza cha Reli ya Kati chenye urefu wa kilometa 300 unatarajiwa kuanza mwezi Aprili, mwaka huu huku uwekaji wa jiwe la msingi ukitarajiwa kufanyika wiki hii.

FikraPevu imeelezwa kwamba, kipande hicho ambacho ni cha kutoka Dar es Salaam hadi Morogoro kikihusisha kilometa 203 za njia kuu na kilometa 100 za michepuko (Spurs) ni sehemu ya kilometa 1,219 zinazotarajiwa kuanza kujengwa katika kiwango cha kisasa (Standard Gauge) kutoka Dar-Tabora-Isaka-Mwanza.

Meneja Uhusiano wa Kampuni Hodhi ya Rasilimali za Reli (Rahco), Catherine Moshi, ameieleza FikraPevu kwamba, reli hiyo itajengwa kwa awamu kwa kuanzia na kipande hicho cha Dar es Salaam-Morogoro.

Mkurugenzi Mkuu wa Kampuni Hodhi Miliki ya Rasilimali za Reli (RAHCO), Masanja Kadogosa (wa tatu kutoka kulia waliokaa), akisaini Mkataba wa awamu ya kwanza ya ujenzi wa reli ya Kisasa (Standard Gauge) na wawakilishi wa Makampuni yatakayojenga reli hiyo jijini Dar es Salaam Februari 3, 2017.

“Mambo yamekwishaiva na hivi ninavyozungumza na wewe maandalizi ya kuweka jiwe la msingi yanaendelea ambapo uzinduzi rasmi utafanyika wiki ijayo ili kuwapa fursa makandarasi waanze ujenzi mara moja,” alisema Moshi.

Februari 3, 2017 Serikali ilitiliana saini ya makubaliano ya ujenzi wa kipande cha reli katika mkataba wa ubia na kampuni za Yapi Merkezi ya Uturuki na Mota-Engil Africa ya Ureno kwa gharama ya Dola 1.1 milioni za Kimarekani.

Utiaji huo wa saini ulishuhudiwa na Waziri wa Ujenzi, Uchukuzi na Mawasiliano, Profesa Mbarawa, Makamu Mwenyekiti wa Kampuni ya Yapi Merkezi, Erdem Arioglu, Mkurugenzi Mtendaji wa Kampuni ya Mota-Engil Africa, Manuel Antonio Mota, Katibu Mkuu wa Wizara hiyo Sekta ya Uchukuzi, Dkt. Leonard Chamuriho, na Mkurugenzi Mkuu wa (RAHCO), Masanja Kadogosa.

FikraPevu imeelezwa kwamba, ujenzi huo utafanyika kwa miezi 30 ukihusisha ujenzi wa miundombinu ya umeme, stesheni sita za abiria na sita za kupishana treni na ujenzi wa wigo wa 102km kwa usalama wa watu na magari.

“Zoezi la kubomoa majengo yaliyo ndani ya hifadhi ya reli linaendelea kote katika reli hii kwa sasa, tunataka mkandarasi akianza ujenzi asikumbane tena na vikwazo ambavyo vinaweza kukwamisha utekelezaji wake,” amesema Moshi.

Treni ya kasi zaidi

Treni kama hii ndiyo itakayotumika kusafirisha abiria katika Reli ya Kati mara ujenzi wa kiwango cha kisasa (Standard Gauge) utakapokamilika.

Waziri wa Ujenzi, Uchukuzi na Mawasiliano Profesa Makame Mbarawa alisema wakati wa utiaji saini mkataba huo kwamba, ujenzi wa reli hiyo itayotumia umeme na kwenda kwa kasi ya kilometa 160 kwa saa itakuwa ni ya kwanza kwa Afrika ikifuatiwa na nchi ya Morocco.

“Tunataka kuifanya nchi yetu iwe ndogo kwa kutumia miundombinu ya kisasa ndio maana Serikali imeamua kujenga reli hii itakayotumia umeme na kwenda spidi kubwa kuliko nyingine zote barani Afrika,” alisema Prof. Mbarawa.

Aliongeza kuwa, ujenzi wa reli hiyo utaongeza chachu ya maendeleo ya kiuchumi na kijamii kwa wananchi na kubainisha kuwa safari ya Dar hadi Moro itatumia muda wa saa 1:16 wakati Dar hadi Dodoma itatumia muda wa saa 2:30 na safari ya Dar hadi Mwanza itatumia muda wa saa 7:30.

FikraPevu inatambua kwamba, usafiri wa treni utakuwa ni wa haraka baada ya ule wa anga kuliko wa mabasi ambayo kwa kawaida yanatumia saa 3:15 kutoka Dar hadi Morogoro, saa 7:30 kutoka Dar hadi Dodoma na saa 14:00 kutoka Dar es Salaam hadi Mwanza.

Katika mkataba huo, kampuni za Yapi Merkezi na Mota-Engil Africa kila moja ina asilimia 50 baada ya kushinda zabuni.

Nchi za Maziwa Makuu kunufaika

Mtandao wa Reli ya Kati na Reli ya Kaskazini uliopo sasa

Mtandao mpya wa Reli ya Kati na Reli ya Kaskazini

Hata hivyo, Moshi ameieleza FikraPevu kuwa, ujenzi wa reli hiyo kutoka Dar-Tabora-Isaka-Mwanza ni sehemu ya njia zote za Reli ya Kati inayohusisha jumla ya kilometa 2,561, ambapo kukamilika kwake kutarahisisha usafiri kwa nchi za Maziwa Makuu kama Burundi, Rwanda na Jamhuri ya Kidemokrasia ya Congo.

“Njia hizi ni Tabora-Kigoma (411km); Kaliua-Mpanda (210km); Mpanda-Karema Port (111km), Uvinza-Kalelema Border (mpaka na Burundi – 203km); na Isaka-Keza/Rusumo-Ruvubu nchini Rwanda kilometa 407,” alisema.

Akaongeza: “Reli ya zamani (hii inayotumika sasa) ilikuwa inaishia Mpanda, lakini tumeamua kuiongeza hadi Bandari ya Karema ambako itasaidia kubeba mizigo ya nchi jirani ya Jamhuri ya Kidemokrasia ya Congo pamoja na abiria.”

Aidha, mchepuko wa kutoka Uvinza hadi Kalelema kwenye mpaka na nchi ya Burundi nao utasaidia kutanua mtandao wa usafiri wa reli, kwani Warundi nao wataanza kujenga reli hiyo kutoka hapo mpakani hadi Gitega kupitia Musangati.

Kuhusu kipande cha Isaka-Keza, FikraPevu imeelezwa kwamba kutakuwa na makutano hapo Keza ambapo utakuwepo mchepuko wa kutoka Keza kupitia Kabanga (mpakani) hadi Gitega nchini Burundi, na kwamba kipande ambacho kitajengwa na Warundi ni kutoka Kabanga hadi Gitega.

“Tutajenga pia kipande cha Keza hadi Rusumo, mpakani na Rwanda, ambapo Wanyarwanda nao watajenga kipande cha kutoka hapo hadi Kigali,” alisema Moshi.

FikraPevu inafahamu kwamba, bajeti ya ujenzi wa reli hiyo kwa upande wa Tanzania itakuwa kiasi cha Shs. 16.7 trilioni (takriban Dola 7.5 bilioni za Marekani).

Zabuni nyingine kufunguliwa Mei

Ameongeza kuwa, ufunguaji wa zabuni kwa ajili ya ujenzi wa vipande vingine umesogezwa mbele hadi Mei mwaka huu ili kutoka nafasi kwa kampuni zaidi kuomba.

Vipande vilivyosalia katika awamu zinazofuata ni kutoka Morogoro-Makutopora, Dodoma (336km); Makutopora-Tabora (294km); Tabora-Isaka (133km); na Isaka hadi Mwanza (248km).

“Tukimaliza hapo tunageukiza vipande vya Tabora-Kigoma; Kaliua-Karema Port; Uvinza-Keza-Rusumo,” Bi. Moshi aliiambia FikraPevu.

Tunachokijua FikraPevu

Awali, ujenzi wa reli yote ya kati ulikuwa ufanywe na kampuni ya Kichina ya China Railway Construction Corporation Limited (CRCC), lakini mchakato huo ukatenguliwa na kuanza upya.

Wizara ya Fedha na Mipango Dkt. Servacius Likwelile na Naibu Meneja Mkuu (Mikopo Nafuu) wa Benki ya Exim ya China, Zhu Ying, wakitia saini Hati ya Makubaliano ya Ushirikiano wa utekelezaji wa miradi mbalimbali ya maendeleo ukiwemo ujenzi wa Reli ya Kati kwa kiwango cha Kimataifa (Standard gauge), Jijini Dar es salaam. MoU Katibu Mkuu Wizara ya Fedha na Mipango Dkt. Servacius Likwelile akipeana mkono na Naibu Meneja Mkuu (Mikopo Nafuu) wa Benki ya Exim ya China, Zhu Ying, mara baada ya kutia saini Hati ya Makubaliano ya  Ushirikiano wa utekelezaji wa miradi mbalimbali ya maendeleo ukiwemo ujenzi wa Reli ya Kati kwa kiwango cha Kimataifa (Standard gauge), Jijini Dar es Salaam Julai 22, 2016. 

FikraPevu inafahamu kwamba, upembuzi yakinifu wa ujenzi wa reli hiyo ulifanywa na kampuni ya Canarail kutoka Canada ukihusisha njia za Dar-Tabora, Isaka-Kigali, na Keza-Msongati.

Aidha, upembuzi wa njia ya Isaka-Mwanza ulifanywa na kampuni ya Cowi ya Denmark ambayo pia ilifanya kwa reli ya Tabora-Kigoma na Kaliua-Mpanda.

Kampuni ya Cowi pia ilifanya ubunifu wa msingi wa reli mpya kutoka Mpanda hadi Karema Port kwenye Ziwa Tanganyika, wakati ubunifu wa ujenzi wa reli kutoka Uvinza-Msongati nchini Burundi ulifanywa na kampuni ya HP Gauff ya Ujerumani.

Serikali pia ina mpango wa kuifufua njia ya reli ya kutoka Manyoni hadi Singida yenye urefu wa kilometa 115 pamoja na kipande cha kilometa 108 kutoka Kilosa hadi Kidatu kuunganisha na Reli ya Tazara katika jitihada zake za kuimarisha miundombinu ya reli nchini.

Aidha, FikraPevu inatambua kwamba, hivi sasa upembuzi yakinifu unaendelea katika baadhi ya vipande vya Reli ya Kaskazini (zamani ikifahamika kama Reli ya Usambara) kwa kuiboresha kuwa ya kisasa kutoka Ruvu-Mruazi (188km) na Tanga-Moshi-Arusha (438km).

Mpango huo ni pamoja na kujenga reli mpya kutoka Arusha-Musoma (600km) pamoja na tawi la kilometa 70 kwenda Shinyanga kuungana na Reli ya Kati, lakini pia kutakuwa na kipande cha kutoka Ziwa Manyara hadi Ziwa Magadi kwenye machimbo ya magadi katika eneo la Engaruka pamoja na fosfeti huko Minjingu.

Catherine Moshi, Meneja Uhusiano wa RAHCO, ameithibitishia FikraPevu kwamba nia ni kutaka kuunganisha mtandao huo ili kurahisisha usafiri kwa treni kila mahali katika kanda hiyo.

“Kama ukitoka Moshi au Arusha unataka kwenda Rwanda au Burundi unaweza kwenda moja kwa moja bila kupitia Reli ya Kati, itarahisisha usafiri wa abiria na mizigo,” alisema.

Tangu Shirika la Reli Tanzania (sasa Kampuni ya Reli – TRL) lilipobinafsishwa mwaka 2007, njia nyingi za Reli ya Kati zimeshindwa kutumika ipasavyo huku Reli ya Kaskazini ikiwa haitumiki kabisa.

Wakati wa uhai wake, mwaka 2003 mtandao wa reli wa TRC uliweza kusafirisha jumla ya abiria 683,861 na tani 1,442,713 za mizigo, lakini wakati linabinafsishwa kiwango hicho kilikuwa kimepungua hadi kufikia abiria 593,889 na tani 545,241 za mizigo.

Hali hiyo inaelezwa kuchangiwa na ufisadi na uzembe wa watendaji, huku wengi wakituhumiwa kuna njama za makusudi na wafanyabiashara wanaohusika na usafirishaji kupitia malori na mabasi, ili wafanyabiashara hao washike hatamu.

Licha ya uboreshaji wa magari kwa sasa ambayo yanakwenda kwa kasi zaidi tofauti na zamani, pamoja na miundombinu bora ya barabara, usafiri wa reli bado unapaswa kuwepo kwa sababu unaweza kuingiza mapato makubwa kwa serikali.

Mizigo mingi inayosafirishwa na malori, iwe ndani ama nje ya nchi, inaweza kusafirishwa kwa treni na kuondoa msongamano wa malori pamoja na makontena bandarini kama ilivyo sasa, kwani treni moja linaweza kubeba hata makontena 50 yenye urefu wa futi 40 kwa mara moja.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com