Connect with us

Jamii

Usafiri wa treni Dar na maafa yanayonukia

Published

on

NI majira ya saa 11:15 jioni wakati FikraPevu inapowasili katika stesheni kuu jijini Dar es Salaam ili kupata usafiri wa kuelekea Gongo la Mboto.

Hali iliyopo katika kituo hicho inatisha kutokana na umati mkubwa wa wasafiri huo wa garimoshi zinazofanya safari fupi katika Jiji la Dar es Salaam.

Umati huo unadhihirisha wazi kwamba usafiri wa garimoshi umekuwa mkombozi kwa walio wengi katika kuwafikisha maeneo ya katikati ya jiji hilo – wanafunzi kwa wafanyakazi, ambao siku za nyuma walikuwa wakichelewa kwenda shule na kazini kutokana na adha ya msongamano wa magari barabarani.

Kila abiria aliyeingia stesheni anayo tiketi yake, kwani watendaji wa Kampuni ya Reli Tanzania (TRL) huwakatia tiketi nje ya kituo huku wakiwagombea abiria, pengine kila mmoja akitaka kuonyesha makusanyo mengi ya mauzo.

Muda si mrefu honi ya garimoshi inasikika kuashiria kwamba linawasili stesheni na mara linatokea, kwa bahati nzuri ni lile la kuelekea Pugu na siyo la kuelekea Ubungo.

Bila ya kujali kuwa ajali zinaweza kutokea, utingo wa gari moshi hilo wanaacha milango wazi kabla garimoshi halijasimama.

Katika hali ya kushangaza, abiria wanaanza kudandia kwa kusukumana na kuning’inia kabla garimoshi halijasimama.

Wazee, watoto na abiria wengine wasio na uwezo wa kugombea wanaonekana wamesimama ama kusukumwa pembeni na ‘wenye nguvu’.

Kinachowashinda wengi ni kupita madirishani kama ilivyokuwa kwenye usafiri wa daladala miaka kadhaa iliyopita, pengine kutokana na madirisha ya treni kuwa juu zaidi.

kero treniAbiria wakigombea kuingia kwenye treni (Picha kwa hisani ya Kamanda wa Matukio Daima Blog)

“Jamani si watauana sasa! Hivi wakidondoka kwenye mataruma wakati treni halijasimama hali itakuwaje?” anahoji mmoja wa abiria ambaye ameamua kusimama pembeni kidogo kuwapisha wengine wagombee.

Abiria huyo anabainisha kwamba, kwa jinsi hali ilivyo sasa, hakuna tofauti na kile walichokikimbia kwenye daladala ambako walikuwa wakilazimika kupita madirishani ama kwenda kugeuza na magari kukwepa usumbufu, hivyo kulipa nauli mbili kwa safari moja.

“Inahitaji uwe na nguvu ili kupenya, vinginevyo unaweza usipate usafiri na kupata tena treni kwa wakati mwingine inaweza kuwa vigumu kwa vile usafiri hautabiriki, mara nyingine linafanya safari mbili na wakati mwingine linaweza lisirudi kupakia,” anasema abiria huyo ambaye hataki kutaja jina lake.

Wakati linaposimama, tayari mabehewa yote yamejaa huku wengine wakiendelea wakiendelea kugombea.

Ndani ya mabehewa yenyewe hali ni mbaya kutokana na msongamano mkubwa huku hewa nzito ndiyo ikitanda.

FikraPevu inafahamu kwamba, hali ya kudandia usafiri imezoeleka zaidi kwenye daladala hasa ziendazo pembeni mwa mji kama Mbagala, Gongo la Mboto na Mbezi, lakini hili la kudandia garimoshi kabla halijasimama linaonekana kuwa geni.

Hali ya sasa kwenye usafiri huo wa garimoshi imeonekana kuwa ya hatari kwa usalama wa abiria na inaelezwa kwamba inaweza kuleta maafa makubwa siku zijazo ikiwa hatua za makusudi hazitachukuliwa.

treni dar

“Kwanza hili la kudandia, ni hatari kubwa, unaweza kuteleza na kupoteza maisha, lakini msukumano unaotokea kwa abiria wenyewe ni hatari nyingine kwa sababu watu wengi wanaweza hata kuangukia kwenye reli na kukanyagwa,” anasema aliyejitambulisha kwa jina moja la Jonas.

Jonas anasema, tatizo jingine ni msongamano mkubwa kwenye mabehewa kiasi cha watu kukosa hewa nzuri, hali inayoweza kuwafanya abiria wakazimia au hata kupoteza maisha.

Treni ya kwenda Pugu kwa sasa inaelezwa kuwa na mabehewa 16 baada ya kuyapunguza kutoka 32 ya awali, ambapo uwezo wa behewa moja ni kubeba abiria 80 tu, ingawa kwa sasa, hasa nyakazi za asubuhi na jioni, behewa linaweza kubeba abiria hadi 200, jambo ambalo ni la hatari kiusalama.

“Tuko abiria wa kila aina, wapo wenye magonjwa ya kuambukiza kwa njia ya hewa jambo ambalo ni la hatari kwa usalama wa afya za wengine hasa kama hakuna nafasi ya kutosha, wengine wana presha au pumu na wanapobanwa wanaweza kukosa hewa na kupoteza maisha,” anasema.

FikraPevu imebaini kwamba, hali hiyo ya msongamano na kugombea usafiri wa treni inawanyima fursa watu wa makundi muhimu kama wazee, watoto na walemavu ambao hawawezi kupanda ngazi ndefu na zinazoteleza, achilia mbali kudandia.

Uchunguzi huo wa FikraPevu umebaini kutokuwepo kwa muda maalum wa garimoshi hilo kuanza safari ambapo wakati mwingine huchelewa hadi saa moja hasa safari za pili kwenda na kutoka mjini.

Ofisa Uhusiano wa TRL, Mapondela Mohamed, akifafanua kuhusu changamoto hizo aliiambia FikraPevu kwamba, haoni tatizo la abiria kudandia na kwamba TRL haina uwezo wa kuwazuia abiria wasidandie kwa kuwa ngazi za kupandia ziko nje.

“Ngazi za kupandia ziko nje, abiria wanadandia kabla garimoshi halijasimama ni kweli, lakini hata kama utafunga milango haitasaidia, tena ni bora milango iwe wazi ili wakidandia waingie kuliko kuifunga,” alisema Mohamed.

Kuhusiana na utaratibu wa kujali makundi yakiwemo ya walemavu, Mohamed alisema hakuna namna yoyote na akajibu kwa kifupi; “Mbona hata mtoa matangazo wa garimoshi ni mlemavu pia?”

Uamuzi wa serikali kupitia TRL kuanzisha usafiri wa garimoshi kwa safari za katikati ya Jiji la Dar es Salaam unaelezwa kwamba ulikuwa wa manufaa makubwa kutokana na kupunguza msongamano mkubwa wa daladala katika barabara za jiji hilo, ambao kwa miaka kadhaa siyo tu umeleta adha, bali umevuruga hata uchumi kutokana na watu kuchelewa kwenye shughuli mbalimbali.

Hata hivyo, changamoto zinazojitokeza sasa zinaonekana kuwa kikwazo kingine hasa kutokana na kuhatarisha usalama wa abiria, jambo ambalo serikali inapaswa kulishughulikia.

Uzinduzi wa usafiri wa njia ya reli jijini Dar es Salaam ulifanyika Septemba 10, 2012 na safari zilianza rasmi Oktoba 22, 2012 kwa treni la kutoka Ubungo hadi Stesheni.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com