Connect with us

Jamii

Utashi wa kisiasa kuinusuru Dar es Salaam dhidi ya uharibifu wa mazingira

Published

on

November 30 hadi Disemba 2, 2016 kule Mexico ulifanyika mkutano wa mwaka wa viongozi wa majiji makubwa duniani ujulikanao kama ‘C40 Mayor’s Summit’. Mkutano huo uliwakutanisha Mameya na viongozi kutoka katika majiji mbalimbali duniani yanayokuwa kwa kasi kiuchumi.

Mameya hao walikusanyika katika jiji la Mexico City katika mkutano wa 6 unaofanyika kila mwaka ambao ulilenga kujadili njia ambazo viongozi wa majiji hayo wanaweza kuzitumia kutatua viashiria na athari za mabadiliko ya tabia nchi katika nchi zao.

Mkutano huu uliwakutanisha viongozi wa serikali kutoka katika majiji 91, wakiwakilisha wananchi wa majiji hayo duniani kote kubadilishana uzoefu wa jinsi gani wanaweza kupunguza hewa ukaa itokanayo na ukuaji wa viwanda ili kulinda afya, ustawi wa watu waishio katika maeneo ya mijini. Pia mkutano huo uliangazia njia mbadala za kutunza mazingira ili kufikia Malengo ya  Maendeleo Endelevu (SDG’s)– 2030.

Kulingana ripoti ya Malengo ya Maendeleo Endelevu (2017) inaonyesha kuwa katika mwaka 2015 pekee watu bilioni 4 ambao ni sawa asilimia 54 ya watu wote duniani walikuwa wanaishi katika maeneo ya mjini na idadi hiyo inatarajiwa kuongezeka hadi kufikia watu bilioni 5 ifikapo 2030.

Ripoti hiyo inaeleza kuwa ukuaji wa miji umeleta changamoto mbalimbali ikiwemo kuongezeka kwa makazi duni na holela, uchafuzi wa hewa, uhaba wa huduma za msingi na miundombinu ambapo inaiweka miji hiyo katika hatari ya kukumbwa na majanga.

Majiji hayo yanatoa asilimia 55 ya hewa ukaa yote inayotolewa na nchi zote duniani, na yanachangia asilimia 25 ya pato la dunia yaani GDP ambapo mtu 1 kati ya 12 anaishi katika majiji hayo.

Kundi la C40 lilianzishwa mwaka 2005 na sasa linajumuisha majiji 11 ya Afrika yanakuwa kwa kasi: Johannesburg, Cape Town, Dar es salaam, Addis Ababa, Nairobi, Cairo na Lagos, Dakar, Durban, Tshwane na Accra.

Mkutano huo ulishuhudia kutolewa kwa ripoti mpya ya Mkataba wa Paris juu ya Mabadiliko ya Hali ya Hewa ambayo umejengwa katika tafiti zilizofanywa mwaka 2011 katika Mkutano wa C40 uliofanyika Sao Paulo Brazil.

Ripoti hiyo yenye kurasa 400 inatoa taarifa kwa viongozi wa serikali kujitathmini jinsi wanavyoendesha majiji yao, kwa kulinganisha na uzoefu wa majiji mengine yaliyofanikiwa ili kuwasaidia kupunguza athari zitokanazo na mabadiliko ya hali ya hewa.

“Wakati mazungumzo ya kimataifa yakiendelea kutafuta njia mbadala, majiji ya C40 yanaendelea mbele” alisema Meya wa zamani wa jiji la New York Michael Bloomberg ambaye pia ni Mwenyekiti wa bodi ya C40. “ Sisi kama wavumbuzi na wataalamu, majiji yetu yanahusika zaidi na suala hili ikiwa ni changamoto kubwa wakati huu”.

“C40’s inasisitiza katika vipimo na ripoti za kitaalamu zitakazosaidia majiji kutumia rasilimali na kutafuta njia inayofaa na ripoti hii inaonyesha kuwa juhudi zetu zinaleta matokeo ya kuridhisha” alisema Bloomberg akirejea ripoti ya utafiti uliofanywa 2011 na C40,

“Kwa kutumia taarifa hii jinsi inavyofanya kazi – na kipi kinawezekana, majiji yanaweza kuendesha mjadala wa kimataifa juu ya mabadiliko ya tabia nchi na hali joto na kuchangia katika kufikia malengo ya taifa katika kupunguza utoaji wa hewa ukaa”.

Mkutano huo ulikuwa ni muhimu kwani ni muendelezo wa juhudi za kimataifa za kupunguza athari za tabia nchi ambazo zinatishiwa na ongezeko kubwa la viwanda ambavyo hujengwa katika majiji makubwa, na kutoa hewa chafu ambayo huathiri mwenendo wa mvua, joto na afya za watu waishio katika maeneo mbalimbali ulimwenguni.

Lakini jambo nyingine lilijitokeza katika mkutano huo, ni tathmini iliyofanywa na kugundua kuwa majiji ya Dar es salaam na Nairobi nchini Kenya ni moja ya majiji barani Afrika ambayo yanakuwa kwa kasi kiviwanda na kuwa na ongezeko kubwa la watu.

Majiji hayo mawili yanafuata nyuma ya majiji ya Lagos, Cape Town, Addis Ababa, Johannesburg na Cairo ambayo yanatajwa na mkutano huo kuwa ni majiji makubwa Afrika ambayo pia yanakabiliwa na changamoto nyingi za mabadiliko ya tabia nchi.

Jiji la Dar es salaam linakuwa kwa kasi na kuwa kitovu muhimu cha uchumi wa Tanzania na Afrika Mashariki ambapo idadi kubwa ya viwanda, biashara na shughuli nyingine za kiuchumi zinaratibiwa na kuendeshwa katika jiji hilo.

Muonekano wa jiji la Dar es salaam

Changamoto kubwa ya jiji hilo ni ongezeko kubwa la watu ambalo haliendani na miundombinu iliyopo kwa maana ya barabara, maji, umeme, mpangilio wa makazi na huduma muhimu za kijamii.

Kutokana na ofisi nyingi za serikali kujengwa katika jiji hilo watu wengi hukimbia kutoka mikoa mingine na kuingia  Dar es salaam kila siku kufuata huduma muhimu ambazo hazipatikani katika mikoa yao.

Hali hiyo imesababisha kuwepo kwa makazi mengi yasiyo na mpangilio mzuri, adha ya usafiri na foleni kubwa za magari, ambayo husababishwa na kasi ndogo ya utanuzi wa barabara kuu na za pembezoni mwa jiji.

Kutokana na ukweli kuwa usafiri ni tatizo, ajali nyingi hutokea hasa za magari na bodaboda na kuchangia zaidi ya vifo 400 vinavyotokana na ajali kila mwaka.

Kwa mujibu wa takwimu za Kikosi Cha Usalama Barabarani nchini zinaeleza kuwa kuanzia Januari hadi Julai 2016, watu 1,580 wamekufa kutokana na ajali za barabarani, wengine 4,659 walijeruliwa katika ajali 5,152 zilizotokea nchi nzima. Kwa upande wa pikipiki waliokufa walikuwa 430,, waliojeruliwa 1,147 katika ajali 1,356.

Muonekano wa jiji hilo sio wa kuvutia hasa katika utunzaji wa mazingira, maeneo mengi ni machafu yakiwa na miundombinu mibovu ya maji taka, makazi duni, kuzagaa kwa chupa na mifuko ya plastiki katika mitaa.

 Takwimu za mtandao wa SoapBoxies (2016) unaoangazia utunzaji wa mazingira duniani, unaliweka jiji la Dar es salaam katika nafasi ya 12 miongoni mwa majiji 25 ambayo yanaongoza kwa uchafu duniani huku mipango mibovu ya usimamizi wa taka ikitajwa kama sababu inayosababisha hali hiyo. 

Inaelezwa kuwa ipo mipango mizuri ya kuboresha jiji hilo lakini inakwamishwa na mgongano wa maslahi ambao unasababishwa na utofauti wa kisiasa wa viongozi ikizingatiwa jiji hilo linaongozwa na Meya kutoka upinzani.

Isaya  Mwita, Meya wa jiji la Dar es salaam katika ripoti ya 2016 iliyowekwa kwenye tovuti ya C40 inaeleza mipango kutatua changamoto zilipo hasa mabadiliko ya hali hewa ambayo ni matokeo ya uwepo wa viwanda vingi vinatoa hewa ya ukaa. 

‘’Ili jiji letu liwe safi na kuwa sehemu nzuri ya kuishi, tutaimarisha juhudi za ukusanyaji taka, usafiri na kujenga vituo na maeneo ya kuhifadhi uchafu. Tutashirikiana na wadau, ili taka zitumike kuzalisha umeme wa gesi utakaotokana na taka zilizofukiwa chini ya ardhi. Mabadiliko hayo yataongeza mapato kutoka katika usimamizi wa taka na kuwa na uwezo wa kutengeneza mbolea kutokana na taka” inaeleza ripoti hiyo.

Lakini anasema suala hilo halizuii kutengeneza sera na miradi mbalimbali inayolenga kuliweka jiji hilo katika sura mpya. Katika kutatua changamoto ya usafiri, serikali inaendelea kutekeleza mradi mkubwa wa barabara za mabasi yaendayo kasi ambao unaratibiwa na Mabasi yaendayo haraka Dar Rapid Transit Agency (DART)” kwa udhamini wa Benki ya Dunia. Mradi huo umesaidia kupunguza foleni hasa kwa magari yanayotoka Kimara kuelekea katikati ya mji. 

Mradi wa mabasi yaendayo haraka (DART) ni miongoni mwa mikakati ya kupunguza foleni Dar es salaam

Ujenzi wa  barabara za pembezoni mwa jiji ambazo zitakuwa mbadala wa kupunguza foleni zisizokuwa za lazima. Pia mradi anuani za makazi ili kuwa na mpangilio mzuri wa jiji na utambulisho wa makazi unaendelea.

Sambamba na hilo ni kufunga kamera za video katika maeneo muhimu ya majengo na barabara kuu, ili kuchunguza mwenendo wa watu na shughuli za kiuchumi na kijamii kuhakikisha jiji linakuwa na usalama wakati wote.

Suala la usafi pia linapewa kipaumbele kuhakikisha jiji linavutia hasa kwa wageni ambapo mradi wa kukusanya taka ngumu na kuzibadilisha kuwa mbolea itakayotumiwa na wakulima na kutengenezea umeme kutoa nishati kwa wananchi uko katika mchakato muhimu.

Ofisi ya jiji inaendelea kutenga maeneo ambayo yatatumiwa kujenga miji ya mifano kama walivyofanya kwa mji wa Kigamboni ambao umeanza kujengwa na ukikamilika utalipatia jiji mapato kwasababu utakuwa kivutio kikubwa kwa watalii.

Kulibadilisha jiji la Dar es salaam katika muonekano wa aina yake kama yalivyo majiji mengine duniani inawezekana, kinachohitajika ni uwajibikaji na uwazi wa viongozi wakishirikiana na wananchi katika maamuzi muhimu ya kuliendeleza jiji hilo linalokuwa kwa kasi barani Afrika.

Licha ya changamoto hizo bado jiji hilo limeendelea kujipatia sifa mbalimbali ndani na nje ya nchi kwa kuwa na bandari inayohudumia mataifa ya Afrika Mashariki na kuwa kiungo muhimu cha biashara za kimataifa ambazo hufanywa Kusini mwa jangwa la Sahara.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2020 FikraPevu.com